Jambyl oblysy azamattyq ister jónindegi sot alqasy Qordaı aýdany turǵyndarynyń jer ýchaskelerin «BTA bankke» kepilge berýdi zańsyz dep taýyp, jerdi turǵyndarǵa qaıtaryp berý týraly sheshim shyǵardy. Bul týraly Joǵarǵy sottyń baspasóz qyzmeti aıtty, dep habarlaıdy «Adyrna» tilshisi.
2006 jyly "BTA Bank" men "Qazeksım" JShS arasyndaǵy kredıttik shart negizinde jalpy kólemi 14 myń gektardan asatyn 16 jer ýchaskesi "Qazeksım" JShS-niń qaryzyn qamtamasyz etý úshin bankke kepilge berilgen. Jer paıdalanýshylary nesıe sharty men jer ýchaskeleriniń kepilge berilgeni týraly 2010 jyldyń qyrkúıek aıynda bilgen.
2010 jáne 2017 jyldardaǵy sot úkimderimen "Qazeksım" JShS bas dırektory, M.K.Áblıazov jáne basqa da uıymdasqan top músheleri sottaldy. Olardan Banktiń paıdasyna materıaldyq zalaldyń edáýir somasy óndirilgen.
«Boryshty qaıtarý boıynsha óz mindettemelerin oryndamaýyna baılanysty 2011 jyly Jambyl oblysynyń prokýrory "BTA Banki" AQ-nyń múddesi úshin sotqa talap aryzben júgingen. 2011 jylǵy sottyń sheshimimen "Qazeksım" JShS-nen banktiń paıdasyna jaýapkerlerdiń múlkinen óndirip alý jolymen 3 mlrd.teńgeden astam qaryz óndirildi. 2016 jyldyń qyrkúıek aıynda JSO atqarýshylyq is júrgizý óndirisi qozǵalyp, “Qazeksım" JShS kepilge qoıylǵan múlkine óndirip alý boıynsha atqarýshylyq áreketteri jasaldy. 2018 jyly aýkıondyq saýda-sattyq júrgizilip, onyń nátıjeleri boıynsha 5 jer ýchaskesi satylyp ketken. Sot alqasy 2018 jylǵy sot sheshimi zańsyz degen sheshimge keldi, sebebi ol jer ýchaskeleri "Qazeksım" JShS-ne zańsyz berilgenin anyqtap, osyǵan baılanysty jer ýchaskeleri Qordaı aýdanynyń turǵyndaryna qaıtarylýǵa jatady dep tapty»,— delingen habarlamada.
