قاراعاندىداعى كيرزاۆود اۋدانىندا 90 مىڭ ەكى جىلدىق قاراعاي كوشەتتەرىن ەگەدى.
بۇل اۋماقتى ەكى جىل بۇرىن وت شارپىپ، كوپتەگەن اعاشتار ورتەنىپ كەتكەن بولاتىن.
ورمان اۋماقتارىن جاپپاي قالپىنا كەلتىرۋ جۇمىستارى "تازا قازاقستان" اكتسياسى اياسىندا ءوتىپ جاتىر جانە وبلىس ورتالىعىنىڭ 90 جىلدىعىنا ارنالعان.
20 گەكتارعا جاس اعاشتاردى ورمان شارۋاشىلىعىنىڭ، تابيعي رەسۋرستار باسقارماسىنىڭ 100 مامانى مەن مەملەكەتتىك قىزمەتكەرلەر ءوز قولدارىمەن ەكتى.
– قاراعاندى وبلىسىنىڭ ەلدى مەكەندەرىندە جىل سايىن 60 مىڭ اعاش ەگىلەدى. بۇل جۇمىستى جەرگىلىكتى اتقارۋشى ورگاندار جالعاستىرۋدا. بيىل دا سونشا اعاش ەگەمىز، – دەدى تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى باقتيار سانباەۆ.
قاراعاي ەگۋگە قاراعاندى وبلىسىنىڭ اكىمى ەرماعانبەت بولەكپاەۆ قاتىستى.
– وبلىسىمىزدىڭ بارلىق تۇرعىندارىنا، ەرىكتىلەرگە، كاسىپورىندارعا، ۇيىمدارعا پرەزيدەنتتىڭ باستاماسىن قولداعانى جانە بۇقارالىق سەنبىلىكتەرگە بەلسەندى قاتىسقانى ءۇشىن العىس ايتقىم كەلەدى. بۇل ءبىر رەتتىك اكتسيا ەمەس، ۇنەمى تازالىقتى ساقتاپ وتىرۋ قاجەت. جۇمىستىڭ تاعى ءبىر ماڭىزدى بولىگى – كوگالداندىرۋ جانە ەكولوگيانى جاقسارتۋ. الداعى ءۇش جىلدا وبلىستا 3 ميلليون اعاش ەگۋدى جوسپارلاپ وتىرمىز. تۇرعىنداردان تازالىقتى ساقتاۋدى جانە وسىنداي ءىس-شارالارعا بەلسەندى قاتىسۋدى سۇراعىم كەلەدى. ەگەر بالالارىمىزدى جاستايىنان تازالىققا ۇيرەتسەك، ءۇيىمىز دە، اۋلامىز دا، قالامىز دا، ەلىمىز دە تازا بولادى، – دەيدى وبلىس باسشىسى.
ءوز كەزەگىندە ورمان شارۋاشىلىعى ارداگەرلەرى جاس اعاشتارعا قالاي جاقسى كۇتىم جاساۋ كەرەكتىگى تۋرالى كەڭەستەرىمەن ءبولىستى.
– بۇگىن ءبىزدى اعاش ەگۋگە شاقىرعانىنا وتە قۋانىشتىمىن. جاسىل جەلەكتەردىڭ جەرسىنۋى ويداعىداي وتەدى دەپ ۇمىتتەنەمىز. كوگالداندىرۋ - يگى جانە قاجەتتى ءىس، ونى ناسيحاتتاۋ، ازاماتتاردى جاسىل ايماقتى كەڭەيتۋگە شاقىرۋ قاجەت، – دەيدى ورمان شارۋاشىلىعى ارداگەرى 85 جاستاعى ميحايل جاكۋپوۆ.
بيىل قاراعاندى وبلىسىنىڭ مەملەكەتتىك ورمان قورى اۋماعىندا بارلىعى 1 272 000 جاپىراقتى جانە قىلقان جاپىراقتى كوشەت ەگىلەدى. جاپىراقتى اعاشتار – ۇيەڭكى مەن قاراعاش نوۆودولينسك تالىمباعىندا وسىرىلگەن. 200 مىڭعا جۋىق جاس اعاش ەگۋگە دايىن تۇر.
كوشەتتەردى سۋارۋ جانە جەرسىنۋىن ورمان شارۋاشىلىعى قىزمەتكەرلەرى باقىلايدى. ينسپەكتورلار رەيدتەر جۇرگىزەدى.
