Qaraǧandydaǧy Kirzavod audanynda 90 myŋ ekı jyldyq qaraǧai köşetterın egedı.
Būl aumaqty ekı jyl būryn ot şarpyp, köptegen aǧaştar örtenıp ketken bolatyn.
Orman aumaqtaryn jappai qalpyna keltıru jūmystary "Taza Qazaqstan" aksiiasy aiasynda ötıp jatyr jäne oblys ortalyǧynyŋ 90 jyldyǧyna arnalǧan.
20 gektarǧa jas aǧaştardy orman şaruaşylyǧynyŋ, tabiǧi resurstar basqarmasynyŋ 100 mamany men memlekettık qyzmetkerler öz qoldarymen ektı.
– Qaraǧandy oblysynyŋ eldı mekenderınde jyl saiyn 60 myŋ aǧaş egıledı. Būl jūmysty jergılıktı atqaruşy organdar jalǧastyruda. Biyl da sonşa aǧaş egemız, – dedı Tabiǧi resurstar jäne tabiǧatty paidalanudy retteu basqarmasynyŋ basşysy Baqtiiar Sanbaev.
Qaraǧai eguge Qaraǧandy oblysynyŋ äkımı Ermaǧanbet Bölekpaev qatysty.
– Oblysymyzdyŋ barlyq tūrǧyndaryna, erıktılerge, käsıporyndarǧa, ūiymdarǧa Prezidenttıŋ bastamasyn qoldaǧany jäne būqaralyq senbılıkterge belsendı qatysqany üşın alǧys aitqym keledı. Būl bır rettık aksiia emes, ünemı tazalyqty saqtap otyru qajet. Jūmystyŋ taǧy bır maŋyzdy bölıgı – kögaldandyru jäne ekologiiany jaqsartu. Aldaǧy üş jylda oblysta 3 million aǧaş egudı josparlap otyrmyz. Tūrǧyndardan tazalyqty saqtaudy jäne osyndai ıs-şaralarǧa belsendı qatysudy sūraǧym keledı. Eger balalarymyzdy jastaiynan tazalyqqa üiretsek, üiımız de, aulamyz da, qalamyz da, elımız de taza bolady, – deidı oblys basşysy.
Öz kezegınde orman şaruaşylyǧy ardagerlerı jas aǧaştarǧa qalai jaqsy kütım jasau kerektıgı turaly keŋesterımen bölıstı.
– Bügın bızdı aǧaş eguge şaqyrǧanyna öte quanyştymyn. Jasyl jelekterdıŋ jersınuı oidaǧydai ötedı dep ümıttenemız. Kögaldandyru - igı jäne qajettı ıs, ony nasihattau, azamattardy jasyl aimaqty keŋeituge şaqyru qajet, – deidı Orman şaruaşylyǧy ardagerı 85 jastaǧy Mihail Jakupov.
Biyl Qaraǧandy oblysynyŋ memlekettık orman qory aumaǧynda barlyǧy 1 272 000 japyraqty jäne qylqan japyraqty köşet egıledı. Japyraqty aǧaştar – üieŋkı men qaraǧaş Novodolinsk tälımbaǧynda ösırılgen. 200 myŋǧa juyq jas aǧaş eguge daiyn tūr.
Köşetterdı suaru jäne jersınuın orman şaruaşylyǧy qyzmetkerlerı baqylaidy. İnspektorlar reidter jürgızedı.
