سۋ شارۋاشىلىعى جانە يرريگاتسيا ءمينيسترى سۋ تاسقىنى زاردابى رەتتەلمەي جاتىپ، الداعى سۋارۋ ماۋسىمى جايىندا ايتتى، دەپ حابارلايدى "ادىرنا" ۇلتتىق پورتالى.
"قازاقستان بويىنشا «قازسۋشار» فيليالدارى تاسقىن سۋىن اپاتسىز وتكىزۋدى قامتاماسىز ەتىپ، الداعى سۋارۋ ماۋسىمىنا دايىندالىپ جاتىر،"- دەپ مالىمدەدى سۋ شارۋاشىلىعى جانە يرريگاتسيا ءمينيسترى نۇرجان نۇرجىگىتوۆ ءساۋىردىڭ 23 - ىندە.
ءمينيستردىڭ ايتۋىنشا، سۋ تاسقىنى كەزىندە «قازسۋشار» مەكەمەسىنىڭ سولتۇستىك قازاقستان فيليالىنىڭ ماماندارى سەرگەەۆ سۋ تورابىنىڭ جاعالاۋىن نىعايتۋ جۇمىسىن جۇرگىزگەن. 82 توننادان استام كەسەك تاس، 15 تەمىربەتون پليتا، 25 تەمىربەتون بلوكتارى جانە باسقا ماتەريالدار توسەلگەنىن ايتقان ءوزىنىڭ تەلەگرام ارناسىنداعى مالىمدەمەسىندە مينيستر.
كازتالوۆ اۋدانىندا كوكتەمگى تاسقىن سۋىن اپاتسىز وتكىزۋ ءۇشىن «قازسۋشاردىڭ» باتىس قازاقستان فيليالى ۇلكەن وزەن وزەنىندەگى ۋاقىتشا توپىراق بوگەتتەرى اشىلعان. ناتيجەسىندە سۋ ليماندار مەن تابيعي شابىندىقتارعا جىبەرىلىپ، ەلدىمەكەندەردى سۋ باسۋ قاۋىپى ازايدى. سونىمەن قاتار، سۋ تاسقىنىنىڭ ەكىنشى تولقىنى كەزىندە ورال-كوشىم سۋارۋ-سۋلاندىرۋ جۇيەسىنىڭ 4 سۋ قويماسىنا سۋ جينالىپ جاتىر. قازىر ولاردا 200 ميلليون تەكشە مەتردەن استام سۋ جينالدى، بۇل جالپى كولەمنىڭ 84 پايىزىن قۇرايدى. «قازسۋشار» ماماندارى رەسەي فەدەراتسياسىنىڭ ورىنبور جانە ساراتوۆ وبلىستارىنىڭ سۋ قىزمەتتەرىمەن ۇنەمى اقپارات الماسۋدا،"- دەيدى سۋمين.
مينيستر نۇرجىگىتوۆتىڭ مالىمدەۋىنشە، اباي وبلىسىنىڭ ءۇرجار اۋدانىندا قاراكول سۋ قويماسىنىڭ قۇرىلىسى جانە كوكپەكتى اۋدانىندا ۇلكەن بوكەن وزەنىندەگى سۋ تورابى تازارتىلعان. شىعىس قازاقستان فيليالى كۇرشىم اۋدانىنداعى «جاۋعاشتى» ماگيسترالدىق كانالىنىڭ باس قۇرىلىسىن تازارتقان. مارقاكول اۋدانىنىڭ ورتا-تەرەكتى سۋ قويماسىندا ينەرتتى ماتەريالدار دايىندالعان.
«قازسۋشار» مەكەمەسىنىڭ قوناەۆ اتىنداعى ۇلكەن الماتى كانالى فيليالى قاراتۇرىق سۋارۋ الابىنىڭ شارۋاشىلىق جەلىسىن مەحانيكالىق ادىسپەن تازارتقانىن ايتقان سۋ شارۋاشىلىعى ءمينيسترى «وبەدينيتەلنىي» ماگيسترالدىق كانالىنىڭ ءتۇبىن بەتونداۋ جۇمىسى ءجۇرىپ جاتقانىن جەتكىزگەن.
نۇرجان نۇرجىگىتوۆتىڭ ايتۋىنشا، ۇلكەن الماتى كانالىنىڭ اۆاريالىق ۋچاسكەلەرىن رەكونسترۋكتسيالاۋ جۇرگىزىلۋدە. سۋارۋ ماۋسىمىنا تولىق دايىندىقتى قامتاماسىز ەتۋ ءۇشىن جۇمىس ەكى اۋىسىمدا اتقارىلىپ جاتىر. بۇدان باسقا، الماتى وبلىسىنىڭ ىلە جانە جامبىل اۋداندارىنىڭ شارۋالارىن سۋمەن قامتاماسىز ەتەتىن سول جاعالاۋداعى ماگيسترالدىق كانالدى بەتونداۋ جانە مەحانيكالىق تازارتۋ جۇمىسى جۇرگىزىلۋدە.
ەرىگەن قار جانە جاڭبىر سۋىن كەدەرگىسىز وتكىزۋ ءۇشىن الماتى وبلىسى بويىنشا فيليال كۇرتى جانە شەلەك وزەندەرىنىڭ ارنالارىن تازارتادى.
«قازسۋشار» مەكەمەسىنىڭ اقمولا فيليالىنىڭ ماماندارى «الۆا» ليماندى سۋارۋ جۇيەسىنىڭ بوگەتىنە ينەرتتى ماتەريالدار توسەدى. "وسىلايشا، بوگەتتىڭ بۇزىلۋ قاۋپى ازايدى،"- دەيدى مينيستر.
ءسۋميننىڭ حابارلاۋىنشا، سۋارۋ كەزەڭىنە دايىندىق ءۇشىن جامبىل وبلىسى بويىنشا «قازسۋشار» فيليالى جالپى ۇزىندىعى 48 شاقىرىم بولاتىن 6 كانالدا مەحانيكالىق تازالاۋ جانە جوندەۋ جۇمىستارىن جۇرگىزگەن. قورداي اۋدانىندا گەورگيەۆسكي ماگيسترالدىق كانالى تازارتىلدى. مەركى اۋدانىندا 11 سۋ بەكەتى جوندەلىپ جاتىر، ودان كەيىن تاعى 20 سۋ بەكەتى جوندەلمەك. سونداي-اق، R-3 ارناسىن سۋارۋ ماۋسىمىنا دايىنداۋ جۇمىسى ءجۇرىپ جاتىر.
مينيستر نۇرجان نۇرجىگىوۆتىڭ ايتۋىنشا، «قازسۋشاردىڭ» قىزىلوردا فيليالى جالپى ۇزىندىعى 51,4 شاقىرىم 11 ارنانى مەحانيكالىق ادىسپەن تازالاپ، سونداي-اق 19 گيدروتەحنيكالىق قۇرىلىستى جانە 23 گيدروپوستتى جوندەۋدەن وتكىزگەن. قازىرگى ۋاقىتتا 32,7 شاقىرىم كانال تازارتىلىپ، 9 گيدروتەحنيكالىق قۇرىلىم جوندەلدى. 20 گيدروپوستتاعى كوپىرلەر قايتا جاڭارتىلۋدا. جەتىسۋ وبلىسى بويىنشا «قازسۋشار» فيليالى بيىل 173,1 شاقىرىم كانالدى تازارتۋدى، 54 گيدروتەحنيكالىق قۇرىلىستى جانە 10 گيدروپوستتى جوندەۋدەن وتكىزۋدى جوسپارلاپ وتىر. بۇگىنگى تاڭدا 40 شاقىرىم كانال تازارتىلدى، 1 گيدروتەحنيكالىق قۇرىلىس سالىندى، ء4–ى جوندەلدى. 1060 شارۋا قوجالىعىمەن سۋ بەرۋ تۋرالى شارتتارعا قول قويىلدى. فەرمەرلەر 20 مىڭ گەكتارعا جۋىق القاپتى سۋارۋ ءۇشىن 174 ميلليون تەكشە مەتر سۋ الادى.
ءمينيستردىڭ مالىمدەمەسىنە قاراعاندا، سۋارۋ كەزەڭىنە دايىندىق ءۇشىن «قازسۋشار» مەكەمەسىنىڭ تۇركىستان وبلىسى بويىنشا فيليالى 33 كانالدى مەحانيكالىق ادىسپەن تازالاۋ جۇمىسىن جۇرگىزگەن. سۋ قويمالارىنىڭ تاسقىن سۋىن قابىلداۋعا دايىندىعىن باعالاۋ ءۇشىن ولاردىڭ تەحنيكالىق جاعدايىنا تەكسەرىس جۇرگىزىلدى. سونداي-اق، تەحنيكا دا تەكسەرىلىپ، قاجەتتى ينەرتتى ماتەريالدار دايىندالدى.
نۇرجىگىتوۆتىڭ ايتۋى بويىنشا، «قازسۋشاردىڭ» قاراعاندى فيليالى جارتاس سۋ قويماسىنداعى جارتاس جانە مالوكومسپاي ماگيسترالدىق كانالدارى ۋچاسكەلەرىنىڭ بەتون بەتكەيلەرى مەن تۇبىنە جوندەۋ جۇمىسىن جۇرگىزگەن. بۇعان قوسا ارنالاردى لاي مەن وسىمدىكتەردەن تازارتۋ باستالعان. 5 گيدروتەحنيكالىق قۇرىلىستا جەرگىلىكتى دابىل جۇيەلەرى ورناتىلۋدا.
"اقتوبە وبلىسى بويىنشا فيليال ءۇش ءىرى سۋ قويماسى مەن بىرنەشە ليمانداردىڭ جۇمىسىن باقىلايدى. نىساندار شتاتتىق كەستەگە ساي جۇمىس ىستەپ تۇر، ماسەلە بايقالمايدى،"- دەيدى سۋ شارۋاشىلىعى جانە يرريگاتسيا ءمينيسترى نۇرجان نۇرجىگىتوۆ.
