24 ساۋىردە قاراعاندى وبلىسىندا جولاۋشىلار پويىزىنىڭ تەحنيكالىق ۆاگونى رەلستەن شىعىپ كەتتى. ءتارتىپ ساقشىلارى تەكسەرۋ جۇمىستارىن باستادى. بۇل تۋرالى كولىكتەگى پوليتسيا دەپارتامەنتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، 24 ساۋىردە قاراعاندى وبلىسىندا اعادىر مەن ايسا ستانسالارىنىڭ اراسىندا جولاۋشىلار پويىزى ۆاگونى رەلستەن شىعىپ كەتكەن.
كولىكتەگى پوليتسيا دەپارتامەنتىنىڭ وكىلدەرى قاراعاندى وبلىسىندا تەحنيكالىق ۆاگوننىڭ رەلستەن شىعىپ كەتۋىنە قاتىستى تەرگەۋ ءجۇرىپ جاتقانىن اتاپ ءوتتى.
"قاراعاندى-سورتيروۆوچنايا" ستانتسياسىنىڭ جەلىلىك پوليتسيا ءبولىمى جول قوزعالىسى نەمەسە تەمىرجول كولىگىن پايدالانۋ ەرەجەلەرىن بۇزۋ فاكتىلەرى بويىنشا سوتقا دەيىنگى تەرگەۋدى باستادى", - دەلىنگەن حابارلامادا.
ۆەدومستو ازىرگە باسقا اقپارات جاريا ەتىلمەيتىنىن ءمالىم ەتتى.
