ورالدا باستاۋىش سىنىپ مۇعالىمى نادەجدا نيكيتينانى ءوز پاتەرىندە ءولتىرىپ كەتكەن. مۇعالىمنىڭ دەنەسى 25 ساۋىردە تابىلدى، - دەپ حابارلايدى “ادىرنا” ۇلتتىق پورتالى "موي گورود" باسىلىمىنا سىلتەمە جاساپ.
پوليتسيانىڭ مالىمەتىنشە ءىس 99-باپ «كىسى ءولتىرۋ» بويىنشا تەرگەلۋدە. جەدەل ىزدەستىرۋ شارالارى ءجۇرىپ جاتقاندىقتان، باسقا مالىمەتتەر جاريالانبايدى.
قالالىق ءبىلىم ءبولىمى مارقۇمنىڭ تاربيەلى ءارى جاۋاپكەرشىلىگى مول ۇستاز ەكەنىن ايتتى. مۇعالىمدىك جۇمىس ءوتىلى 40 جىل، ونىڭ 35 جىلىندا ءبىر مەكتەپتە جۇمىس ىستەگەن.
نيكيتينا جۇمىس ىستەگەن N9 مەكتەپ ۇجىمى الەۋمەتتىك جەلىدە مارقۇمنىڭ جاقىندارىنىڭ قايعىسىنا ورتاقتاسىپ كوڭىل ايتتى.
«25 ءساۋىر كۇنى مەكتەبىمىز قۇرىلعان كۇننەن باستاپ جۇمىس ىستەگەن باستاۋىش سىنىپ مۇعالىمى نادەجدا ۆلاديميروۆنا نيكيتينا كەنەتتەن قايتىس بولدى. نادەجدا ۆلاديميروۆنا جۇمىس بارىسىندا ءبىر ەمەس بىرنەشە ۇرپاق تاربيەلەپ ءوسىردى، ءوز ءىسىنىڭ كاسىبي مامانى، سۇيىكتى ۇستاز بولدى. بۇل جۇزدەگەن ۇلدار مەن قىزدار جانە ونىڭ جاقىندارى ءۇشىن ورنى تولماس قايعى-قاسىرەت” دەپ اتاپ ءوتتى ۇجىمى.
كورشىلەرىنىڭ ايتۋىنشا، ول مەيىرىمدى، جاۋاپكەرشىلىگى مول، جاناشىر ادام بولعان. مۇعالىم بوس ۋاقىتىندا ءوزى تۇرعان ءۇيدىڭ ومىرىنە بەلسەنە ارالاستى.
«وتە اقكوڭىل، جاۋاپكەرشىلىگى مول جاقسى ادام ەدى. 24 جىل بىرگە تۇردىق، ول جاقىندا عانا اناسىن جەر قوينىنا تاپسىرعان ەدى. ول كۇيەۋىمەن بىرگە 10 جىل بۇرىن بىرگە تۇرعان. ونىڭ ارتىندا ەكى قىزى، ءبىر اعاسى جانە نەمەرەلەرى قالدى. بۇل سۋرەت مەنىڭ كوز الدىمدا»، - دەيدى كورشىسى ءاليا ەسقاليەۆا.
