وتاندىق بيزنەسكە كەلتىرىلگەن زالالدى وتەۋ بويىنشا العاشقى تولەمدەر قوستاناي وبلىسىنان باستالدى.
سۋ باسقان وڭىرلەردە جاعداي تۇراقتانىپ كەلەدى. الدىن الا مالىمەتتەر بويىنشا، بيزنەسكە كەلتىرىلگەن زالالدىڭ جالپى سوماسى شامامەن 27,1 ملرد تەڭگەنى قۇرايدى.
قوستاناي وبلىسىنىڭ وزىندە مۇلىكتىك شىعىندى وتەۋ ءۇشىن شامامەن 50 بيزنەس سۋبەكتى وتىنىم قالدىرعان. سونىڭ ىشىندە ەكى ءوتىنىم شاعىن جانە ورتا كاسىپكەرلىك سۋبەكتىلەرىنە كەلتىرىلگەن مۇلىكتىك شىعىنداردىڭ وتەماقىسىن ايقىنداۋ جونىندەگى وڭىرلىك كوميسسيانىڭ وتىرىسىندا ماقۇلداندى. بۇل كوميسسيا «اتامەكەن» كاسىپكەرلەر پالاتاسى جانىنان قۇرىلعان.
كوميسسيا وكىلدەرى «سىرلىباەۆا ج.س.» جەكە كاسىپكەرلىگى جانە «دوروفەەۆا ج.س.» جەكە كاسىپكەرلىگىنە قاتىستى مۇلىكتىك شىعىنداردى تولىق كولەمدە وتەۋ تۋرالى ءبىر اۋىزدان وڭ شەشىم قابىلدادى.
«سۋ تاسقىنى مەنىڭ بيزنەسىمە زالال كەلتىردى. ءبىز ماكۋلاتۋرانى پرەستەۋمەن اينالىسامىز. مەن «اتامەكەن» پالاتاسىنا جۇگىنىپ، كومەككە قول جەتكىزدىم. وتەماقىعا ءوتىنىش بەردىك، ارتىق سۇراقتارسىز تولىق كولەمدە ماقۇلداندى. ەندى كاسىبىمىزدى جالعاستىرا الامىز»، - دەيدى ءوتىنىم بەرۋشى.
ايتا كەتۋ كەرەك، جاعدايدى جان-جاقتى قاراۋ، سونداي-اق ىقتيمال داۋلى وقيعالاردى بولدىرماۋ ءۇشىن (شەشىم نەمەسە سومامەن كەلىسپەۋ) زارداپ شەككەن ءوتىنىش بەرۋشىلەر وڭىرلىك كوميسسيانىڭ ءار وتىرىسىنا شاقىرىلادى.
قالعان بيزنەس سۋبەكتىلەرى كاسىپكەرلەر پالاتاسىنىڭ وڭىرلىك كوميسسياسىنا ءوتىنىش بەرۋ ءۇشىن راستاۋ قۇجاتتاماسىن دايىنداپ جاتىر. كوميسسيا وتىرىستارى وتىنىشتەردىڭ كەلىپ تۇسۋىنە قاراي وتەتىن بولادى. قاعيدالارعا سايكەس، اقشالاي قاراجات ەگەر جەتكىلىكتى قارجىلاندىرۋ بولسا ءتيىستى شەشىم قابىلدانعان كۇننەن باستاپ ون جۇمىس كۇنى ىشىندە اۋدارىلادى. قاراجات مۇلىك يەسىنىڭ وتەماقى تۋرالى وتىنىشىندە كورسەتىلگەن اعىمداعى نەمەسە جيناق شوتىنا اۋدارىلادى.
سونىمەن قاتار، قوستاناي وبلىسى سۋ تاسقىنىنان زارداپ شەككەن وڭتۇستىك وڭىرلەردىڭ تۇرعىندارىنا جان-جاقتى كومەك كورسەتۋگە بەلسەندى اتسالىسىپ جاتىر.
