Otandyq bızneske keltirilgen zalaldy óteý boıynsha alǵashqy tólemder Qostanaı oblysynan bastaldy.
Sý basqan óńirlerde jaǵdaı turaqtanyp keledi. Aldyn ala málimetter boıynsha, bızneske keltirilgen zalaldyń jalpy somasy shamamen 27,1 mlrd teńgeni quraıdy.
Qostanaı oblysynyń ózinde múliktik shyǵyndy óteý úshin shamamen 50 bıznes sýbekti ótinim qaldyrǵan. Sonyń ishinde eki ótinim shaǵyn jáne orta kásipkerlik sýbektilerine keltirilgen múliktik shyǵyndardyń ótemaqysyn aıqyndaý jónindegi óńirlik komıssııanyń otyrysynda maquldandy. Bul komıssııa «Atameken» kásipkerler palatasy janynan qurylǵan.
Komıssııa ókilderi «Syrlybaeva J.S.» jeke kásipkerligi jáne «Dorofeeva J.S.» jeke kásipkerligine qatysty múliktik shyǵyndardy tolyq kólemde óteý týraly bir aýyzdan oń sheshim qabyldady.
«Sý tasqyny meniń bıznesime zalal keltirdi. Biz makýlatýrany presteýmen aınalysamyz. Men «Atameken» palatasyna júginip, kómekke qol jetkizdim. Ótemaqyǵa ótinish berdik, artyq suraqtarsyz tolyq kólemde maquldandy. Endi kásibimizdi jalǵastyra alamyz», - deıdi ótinim berýshi.
Aıta ketý kerek, jaǵdaıdy jan-jaqty qaraý, sondaı-aq yqtımal daýly oqıǵalardy boldyrmaý úshin (sheshim nemese somamen kelispeý) zardap shekken ótinish berýshiler óńirlik komıssııanyń ár otyrysyna shaqyrylady.
Qalǵan bıznes sýbektileri Kásipkerler palatasynyń Óńirlik komıssııasyna ótinish berý úshin rastaý qujattamasyn daıyndap jatyr. Komıssııa otyrystary ótinishterdiń kelip túsýine qaraı ótetin bolady. Qaǵıdalarǵa sáıkes, aqshalaı qarajat eger jetkilikti qarjylandyrý bolsa tıisti sheshim qabyldanǵan kúnnen bastap on jumys kúni ishinde aýdarylady. Qarajat múlik ıesiniń ótemaqy týraly ótinishinde kórsetilgen aǵymdaǵy nemese jınaq shotyna aýdarylady.
Sonymen qatar, Qostanaı oblysy sý tasqynynan zardap shekken ońtústik óńirlerdiń turǵyndaryna jan-jaqty kómek kórsetýge belsendi atsalysyp jatyr.
