24 مامىر كۇنى شىمكەنت قالالىق قىلمىستىق ىستەر جونىندەگى اۋدانارالىق سوتى “ۇلت ارازدىعىن قوزدىردى” دەپ ايىپتالعان زەينەتكەر قاليما جاپاروۆانى كىنالى دەپ تانىپ، باس بوستاندىعىن ەكى جىلعا شەكتەدى. بۇل تۋرالى ازاتتىق جازدى، دەپ حابارلايدى «ادىرنا» ءتىلشىسى.
سۋديا ماديار ءابدىراسيلوۆ 63 جاستاعى قاليما جاپاروۆانى قىلمىستىق كودەكستىڭ "الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ" بابىمەن (174-باپ) كىنالى دەپ تانىدى. 7 ايدان بەرى قاماۋدا جاتقان زەينەتكەر سوت زالىنان بوساتىلدى. ونىڭ قاماۋدا جاتقان ءبىر كۇنى جازا مەرزىمىنىڭ ەكى كۇنىنە ەسەپتەلىندى. سۋديا جازا تاعايىنداۋ كەزىندە سوتتالۋشىنىڭ جاسى مەن دەنساۋلىعى ەسكەرىلگەنىن اتاپ ءوتتى.
“ۋكراينا جاساسىن!”— دەدى جاپاروۆا سوتتا.
23 مامىر كۇنى پروكۋرور جارىسسوزدە قاليما جاپاروۆا 2020 جانە 2023 جىلدارى شىمكەنتتە قوعامدىق كولىكتە ورىس ۇلتىنىڭ وكىلدەرىنە "ارازدىقتى قوزدىراتىن ءسوز ايتقانىن" جەتكىزگەن. جاپاروۆا رەسەيدىڭ ۋكرايناعا شابۋىلىن ايىپتاعاندا "فاشيستەر", "وككۋپانتتارعا ءولىم" دەگەن سياقتى تىركەستەر قولدانىپ، ولاردىڭ "ۇلتتىق ار-نامىسى مەن قادىر-قاسيەتىن قورلاۋعا باعىتتالعان قاساقانا ارەكەتتەر جاساعان".
بىلتىرعى وقيعادان سوڭ ءوزىنىڭ قۇقىعى بۇزىلعانىن ايتقان ادا ليپينسكايا پوليتسياعا ارىزدانعان، ايعاق رەتىندە وقيعا كەزىندە تۇسىرىلگەن ۆيدەوجازباسىن دا ۇسىنعان. بىراق كەيىن ول ايىپتالۋشىعا كەشىرىم بەرىپ، ءىستىڭ قىسقارۋىنا قارسى ەمەسىن دە ايتقان.
تەرگەۋشى وقيعانىڭ جاي-جاپسارىن انىقتاۋ بارىسىندا جاپاروۆا "2020 جىلى دا ءدال وسىلاي ۇلت ارازدىعىن قوزدىراتىن زاڭبۇزۋشىلىققا باردى" دەگەن ايعاق تاۋىپ، ىسكە قوسقان.
پروكۋرور زەينەتكەردى سول ايعاق نەگىزىندە 4 جىل باس بوستاندىعىنان ايىرۋدى سۇرادى.
“قىلمىستىق كودەكستىڭ "الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ" بابىمەن قوزعالعان قىلمىستىق ءىس ەكسترەميستىك قىلمىسقا جاتادى. زاڭ بويىنشا سوت تەرگەۋى جابىرلەنۋشىنىڭ ارىزىنسىز تەرگەلەدى”،—دەدى سۋديا ءابدىراسيلوۆ سوت ۇكىمىن تۇسىندىرگەندە.
قاليما جاپاروۆا جارىسسوزدە تاعىلعان ايىپتى مويىندامايتىنىن، تەك "رەسەي وككۋپانتتارىنىڭ ۋكرايناعا شابۋىلىن ايىپتاعانىن" جەتكىزگەن. ول سوتتان ءوزىن اقتاپ، سوت زالىنان بوساتۋدى سۇراعان.
63 جاستاعى ايەل 2023 جىلدىڭ قازان ايىندا قاماۋعا الىنعان. قازاقستاندىق قۇقىققورعاۋشىلار ونى سوت سانكتسياسىمەن قاماۋدا جاتقاندا “ساياسي تۇتقىندار” تىزىمىنە قوسقان. قۇقىق قورعاۋشىلاردىڭ مالىمەتىنشە، جاپاروۆا رەسەيدىڭ ۋكرايناداعى سوعىسىنا نارازىلىق بەلگىسى رەتىندە ءۇيىنىڭ الدىڭعى جاعىن ۋكراينا تۋىنىڭ تۇستەرىنە بوياعان. 2020 جىلى پوليتسيا كەلىپ، ونىمەن سويلەسىپ، رەسەي مەن ۋكراينا اراسىنداعى قارىم-قاتىناس ماسەلەسىنە قاتىستى ءوز پىكىرىن ءبىلدىرۋدى توقتاتۋدى تالاپ ەتكەن.
2020 جىلدىڭ 22 اقپانىندا قازاقستانداعى ەكى وپپوزيتسيالىق توپ بيلىككە قارسى نارازىلىق وتكىزۋگە شاقىرعان شاقتا جاپاروۆا شىمكەنتتەگى تاۋەلسىزدىك ساياباعىنىڭ الدىنا شىققان. بىرنەشە بەلسەندىمەن بىرگە ونى پوليتسيا كۇشتەپ اكەتكەن.
