جاقىندا بىرقاتار باق شەتەلدىك تاسىمالداۋشىلارعا ەۋروپالىق جارتىلاي تىركەمەلەردە تاسىمالداۋ/اۋىستىرىپ تيەۋ ءادىسىن قولدانىپ، قازاقستانعا جۇك اكەلۋگە شەكتەۋ قويىلعانى تۋرالى حابارلادى.
بيىل ماۋسىم ايىندا قازاقستان رەسپۋبليكاسىنىڭ قارجى مينيسترلىگى رەسەيلىك جانە بەلارۋستىك ارىپتەستەرىن ەاەو-عا كىرمەيتىن ەلدەردە تىركەلگەن ۋاقىتشا اكەلىنەتىن كولىك قۇرالدارىنىڭ كەدەن ورگاندارىندا ورنالاسۋى مەن قوزعالىسىنىڭ شارتتارىن ساقتاۋ قاجەتتىگى تۋرالى حاباردار ەتتى.
ەاەو كەدەن كودەكسىنىڭ 38-تاراۋىنا سايكەس، ەاەو اۋماعىنا ۋاقىتشا اكەلىنگەن شەتەلدىك جارتىلاي تىركەمەلەردى وتكىزۋ كەزىندە حالىقارالىق كولىك قۇرالدارىن باسقا تۇلعالارعا بەرۋگە، ونىڭ ىشىندە كەرى تيەۋگە بولمايدى، دەپ جازدى «اتامەكەن» ۇقپ.
ەرەجە بۇزىلعان جاعدايدا تاسىمالداۋشىنىڭ كەدەندىك اكەلۋ باجدارىن، سالىقتاردى، ارنايى، دەمپينگكە قارسى، وتەماقى باجدارىن تولەۋ جونىندەگى مىندەتتەمەسى تۋىندايدى.
قايتا بايلانىستىرۋ/قايتا تيەۋ كەزىندە كەدەندىك باقىلاۋدا تۇرعان حالىقارالىق تاسىمالداۋعا ارنالعان كولىك قۇرالى اۋىستىرىلىپ، ولاردىڭ ەاەو كەدەندىك اۋماعىنان شىعارۋ مەرزىمدەرى ساقتالمايدى.
وسىلايشا، ەاەو كەدەن كودەكسىنىڭ بىرقاتار نورمالارى بۇزىلادى. مۇنداي جاعدايلارعا قر «اكىمشىلىك قۇقىق بۇزۋشىلىق» تۋرالى كودەكسىنىڭ 29-بابى بويىنشا جاۋاپكەرشىلىك بەلگىلەنگەن.
«اتامەكەن» قر ۇلتتىق كاسىپكەرلەر پالاتاسى تاسىمالداۋشىلاردىڭ سالالىق بىرلەستىكتەرىمەن بىرگە، قازاقستاندىق كاسىپكەرلىك سۋبەكتىلەرىنە 2024 جىلعى 1 شىلدەدەن باستاپ وسى ستاندارتتاردى ساقتاماعانى ءۇشىن جاۋاپكەرشىلىكتىڭ باستالاتىنى تۋرالى الدىن الا حاباردار ەتتى»، - دەپ مالىمدەدى «اتامەكەن» ۇلتتىق كاسىپكەرلەر پالاتاسى توراعاسىنىڭ ورىنباسارى مۇرات ءامرين.
«بۇگىنگى تاڭدا قازاقستاننىڭ مەملەكەتتىك كىرىستەر ورگاندارى بەلگىلەنگەن تالاپتاردى بۇزعانى ءۇشىن تەك رەسەيلىك جانە بەلارۋستىك تاسىمالداۋشىلاردى عانا ەمەس، سونىمەن قاتار ەاەو كەدەندىك اۋماعىندا اۋىستىرىپ تيەۋ ارقىلى جۇكتەردى تاسىمالداعان قازاقستاندىقتاردى دا ۇستادى»، - دەدى مۇرات ءامرين.
وسىعان بايلانىستى «اتامەكەن» قر ۇلتتىق كاسىپكەرلەر پالاتاسى ەاەو سەرىكتەس ەلدەرىنىڭ بيزنەس-قوعامداستىقتارى كەدەندىك رەتتەۋدىڭ بىرىڭعاي قاعيداتتارىن ساقتاۋ قاجەتتىگى تۋرالى اۋقىمدى اقپاراتتىق جۇمىستاردى جۇرگىزۋ قاجەت دەگەن ۇستانىمدا.
