بۇگىن «بالاساعۇن» ورتالىق كونتسەرت زالىندا «Keleshekke – kemel bilimmen» اتتى وبلىستىق تامىز كەڭەسى ءوتتى، دەپ حابارلايدى adyrna.kz ۇلتتىق پورتالى. جيىنعا جامبىل وبلىسى اكىم اسقار مىرزاحمەتوۆ قاتىسىپ، ۇستازدار قاۋىمىن جاڭا وقۋ جىلىمەن قۇتتىقتادى.
وبلىس اكىمدىگىنىڭ ءبىلىم باسقارماسىنىڭ باسشىسى راحيا تۇرماعانبەتوۆانىڭ ايتۋىنشا، بيىل ءوڭىردىڭ ءبىلىم سالاسىنا 130 ملرد تەڭگە بولىنگەن. اتالعان قارجى وتكەن جىلمەن سالىستىرعاندا 22,2 ملرد تەڭگەگە ارتىق. سونداي-اق ول بۇل قارجىنىڭ 5,1 ملرد تەڭگەسى ءبىلىم بەرۋ نىساندارىنىڭ قۇرىلىسى مەن كۇردەلى جوندەۋ جۇمىستارىنا قاراستىرىلعانىن اتاپ ءوتتى. سونىمەن قاتار، ول وڭىردەگى ءبىلىم جۇيەسىنىڭ جەتكەن جەتىستىكتەرى مەن ءتۇيىندى تۇيتكىلدەرى تۋرالى ماسلەلەلەردى ايتىپ، بايانداما جاسادى.
– وسىعان وراي پرەزيدەنت قاسىم-جومارت توقاەۆتىڭ رەسپۋبليكالىق تامىز كەڭەسىندە ءبىلىم جانە عىلىم سالاسىندا 8 ماسەلەلى مىندەتتەردى شەشۋدى تاپسىرعان. پرەزيدەنت سويلەگەن سوزىندە ۇستازداردىڭ ەل دامۋىنداعى ءرولى تۋرالى ايتقان بولاتىن. بۇل پەداگوگتارعا، ونىڭ ىشىندە جامبىلدىق پەداگوگتارعا دا ۇلكەن جاۋاپكەرشىلىكتى جۇكتەيدى. جالپى كوللەدجدەر، قالا جانە اۋىل مەكتەپتەرىندەگى الشاقتىقتى جويىپ، اتا-انانىڭ قورعاۋىنسىز قالعان جانە مۇمكىندىگى شەكتەۋلى بالالاردىڭ ماسەلەسىن شەشۋىمىز كەرەك، – دەدى ول.
سونىمەن قاتار، راحيا سەيتبەكقىزى وبلىس كولەمىندە كەيبىر گيمنازيا مەن ليتسەيلەردىڭ ەشقانداي كورسەتكىشتەرى بولماسا دا 5-7 جىل ارالىعىندا ديرەكتورلىق قىزمەتتە وتىرعاندىعىن سىنعا الدى. سوندىقتان ول مەكتەپ پەن اتا-انا اراسىنداعى بايلانىستى ارتتىرۋدى تاپسىرىپ، اۋداندارداعى انالار مەن اكەلەر مەكتەبىنىڭ قاعاز جۇزىندە بولماۋىن قاداپ ايتتى.
ال جامبىل وبلىسىنىڭ اكىمى اسقار مىرزاحمەتوۆ ءوزىنىڭ قورتىندى سوزىندە «پەداگوگ مارتەبەسى تۋرالى» زاڭعا ەرەكشە توقتالدى. سونداي-اق، ول پەداگوگ قىزمەتكەرلەردىڭ لاۋازىمدارىنا سايكەس 50-30%-عا دەيىن جالاقىلارىنىڭ كوبەيتىلەتىندىگىن تىلگە تيەك ەتتى.
– جامبىل وبلىسىندا ءوز ىسىنە ادال ۇستازدار جەتكىلىكتى. وعان وقۋشىلاردىڭ حالىقارالىق عىلىمي جارىستاردان جۇلدەلى ورىنداردى يەلەنىپ جاتقاندىعى دالەل بولا الادى. ونىڭ ۇستىنە تۇلەكتەردىڭ 65% گرانت يەگەرى اتانىپ، نازارباەۆ ۋنيۆەرسيتەتى مەن شەت ەلدىك جوعارى وقۋ ورىندارىنا تۇسۋدە. الايدا مۇنداي جەتىستىكتەرگە كوبىنە تاراز قالاسىنىڭ گيمنازيالارى قول جەتكىزىپ جاتقانى جاسىرىن ەمەس، – دەدى وبلىس اكىمى.
سونىمەن قاتار، اكىم 2019 جىلعى جامبىل وبلىستىق كونفەرەنتسياسىنىڭ سوڭىندا بىرقاتار ۇزدىك پەداگوگتاردى ماراپاتتاپ، اعىمداعى جىلى تاراز قالاسىنداعى ا.س.پۋشكين اتىنداعى №41 كوپ سالالى گيمنازيانىڭ «ورتا ءبىلىم بەرەتىن ۇزدىك ۇيىم» بايقاۋىندا جەڭىمپاز اتانعاندىقتان 21 778 000 تەڭگە سەرتيفيكاتىن تابىستادى.
«ادىرنا»
ۇلتتىق پورتالى
