قازاقستان رەسپۋبليكاسى كونستيۋتتسيا كۇنى قارساڭىندا جامبىل وبلىسى، جۋالى اۋدانىندا اقپاراتتىق ورتالىقتار اشىلدى، دەپ حابارلايدى adyrna.kz ۇلتتىق پورتالى جۋالى اۋدانى اكىمدىگىنىڭ ءباسپاسوز قىزمەتىنە سىلتەمە جاساپ.
اقپاراتتىق ورتالىقتىڭ اشىلۋىنا اۋدان اكىمىنىڭ ورىنباسارى ەربول جاڭاباەۆ قاتىسىپ، اۋدان حالقىن اتا زاڭ كۇنىمەن قۇتتىقتاۋ ءسوز سويلەدى. ەربول ساكەنۇلىنىڭ ايتۋىنشا، قازاقستان رەسپۋبليكاسىنىڭ كونستيتۋتسياسى كۇنى – ەل ومىرىندەگى ايشىقتى مەرەكە. وسى كونستيتۋتتسيا كۇنى قارساڭىندا اقتوبە اۋىلدىق وكرۋگىنىڭ ورتالىعى بايتەرەك اۋىلىندا تسيفرلاندىرىلعان اقپاراتتىق ورتالىق اشىلدى. اۋىلدىق كىتاپحانانىڭ ىشىندە ورنالاسقان ورتالىقتى جابدىقتاۋعا 1 ميلليون 300 مىڭ تەڭگە قاراجات ءبولىندى. اتالعان قارجىعا ءۇش كومپيۋتەر، ءبىر امبەباپ كوشىرمە قۇرالى، ينتەرنەت جەلىسى جانە تاعى باسقا قاجەتتى قۇرالدار الىندى.
– قۇرمەتتى اۋىل تۇرعىندارى! سىزدەردى ەڭ الدىمەن ايتۋلى مەرەكە – قازاقستان رەسپۋبليكاسىنىڭ كونستيتۋتسياسى كۇنىمەن قۇتتىقتايمىن. اتا زاڭىمىزدىڭ ارقاسىندا ەلىمىزدە كوپتەگەن يگىلىكتى ىستەر جۇزەگە اسىرىلىپ كەلەدى. تاۋەلسىز ەلىمىزدىڭ دە ەكونوميكاسى ءوسىپ، حالىقتىڭ تۇرمىسى مەن ءال-اۋقاتى ارتىپ كەلەدى. مەملەكەت تاراپىنان قابىلدانعان باعدارلامالار دا ءوز جەمىسىن بەرىپ وتىرعانىن باسا ايتۋعا ءتيىسپىز. مىنە، «تسيفرلىق قازاقستان» باعدارلاماسى ارقىلى ەل وڭىرلەرىندە تسيفرلاندىرۋ ۇدەرىسى قارقىندى جۇرۋدە. شالعاي اۋىلداردا ورنالاسقان كىتاپحانالاردا تسيفرلاندىرىلعان اقپاراتتىق ورتالىقتاردىڭ اشىلۋى – وسىنىڭ ايعاعى. بىلتىرعى جىلى اۋدان كولەمىندە 11 اقپاراتتىق ورتالىق اۋىل تۇرعىندارىنا ەسىگىن ايقارا اشسا، بيىل دا 4 اقپاراتتىق ورتالىقتى جابدىقتاپ، اشقالى وتىرمىز. وبلىس اكىمى اسقار مىرزاحمەتوۆتىڭ ارنايى اقپاراتتىق بازا قالىپتاستىرۋ تۋرالى تاپسىرماسى بار. وسى رەتتە اۋىل تۇرعىندارى بۇل ورتالىقتىڭ مۇمكىندىكتەرىن بارىنشا پايدالانۋى ءتيىس، – دەدى ەربول ساكەنۇلى.
اۋدان اكىمىنىڭ ورىنباسارى ەربول جاڭاباەۆ پەن اۋدان اكىمدىگى مادەنيەت جانە تىلدەردى دامىتۋ ءبولىمىنىڭ باسشىسى ساۋىتبەك ماحامبەتوۆ اقپاراتتىق ورتالىقتىڭ لەنتاسىن قيدى. اۋداندىق ورتالىقتاندىرىلعان كىتاپحانالار جۇيەسىنىڭ ديرەكتورى باقىتكۇل قاناەۆا تسيفرلاندىرىلعان اقپاراتتىق ورتالىقتىڭ جۇمىسىمەن جان-جاقتى تانىستىردى. ونىڭ ايتۋىنشا، اتالعان اقپاراتتىق ورتالىقتىڭ پايداسى شاش ەتەكتەن. سوندىقتان دا ول يگى ىسكە قولداۋ كورسەتكەن اۋدان اكىمىنە ءوز العىسىن جەتكىزدى.
ايتا كەتۋ كەرەك، وسى كۇنى بيلىكول اۋىلدىق وكرۋگىنىڭ قاراباستاۋ اۋىلىندا دا تسيفرلاندىرىلعان اقپاراتتىق ورتالىقتىڭ تۇساۋى كەسىلدى.
«ادىرنا»
ۇلتتىق پورتالى
