قىزىلوردا وبلىسىنا جۇمىس ساپارىمەن كەلگەن قر پرەمەر-ءمينيسترىنىڭ ءبىرىنشى ورىنباسارى رومان سكليار جاڭا جىلۋ-ەلەكتر ورتالىعىنىڭ قۇرىلىس بارىسىمەن جانە شىنى زاۋىتىنىڭ جۇمىسىمەن تانىستى.
مەملەكەت باسشىسىنىڭ، ۇكىمەتتىڭ قولداۋىنىڭ ارقاسىندا بۇگىندە ءوڭىردىڭ ەنەرگەتيكا سالاسىنىڭ دامۋ قارقىنى جوعارى.
قىزىلوردا قالاسىندا 215 ملرد. تەڭگەگە قۋاتتىلىعى 240 مەگاۆاتتىق جاڭا جىلۋ-ەلەكتر ورتالىعى بوي كوتەرىپ كەلەدى. بۇگىندە ينۆەستور «اكسا ەنەردجي» تۇرىك كومپانياسى قۇرىلىسقا 127 ملرد. تەڭگەدەن استام ينۆەستيتسيا سالدى. جاڭا جىلۋ-ەلەكتر ورتالىعى – تاۋەلسىزدىك جىلدارىنداعى ينۆەستور قارجىسىنا سالىنعان ەڭ اۋقىمدى، تەڭدەسىز جوبالاردىڭ ءبىرى. ول ىسكە قوسىلعاندا ءوڭىردىڭ ەلەكتر ەنەرگياسىنا دەگەن قاجەتتىلىگىن تولىق قامتاماسىز ەتەدى. وندىرىلگەن ەلەكتر ەنەرگياسىنىڭ ءبىر بولىگىن ايماقتان تىس جەرلەرگە ساتۋعا مۇمكىندىك تۋادى. ءوڭىر ءۇشىن ايرىقشا ماڭىزعا يە نىسان بيىل ەل يگىلىگىنە تابىستالادى.
«Orda Glass Ltd» جشس شىنى زاۋىتىنداعى جاڭا جەلىنىڭ جۇمىسى دا قارقىندى. زاۋىتتا جىلىنا 197,1 مىڭ توننا شىنى ءوندىرىلىپ، رەسەي وزبەكستان، قىرعىزستان جانە تاجىكستانعا ەكسپورتتالادى. بۇگىندە وندا 366 مامان جۇمىس ىستەيدى، ونىڭ 269-ى – قازاقستاندىق، 97-ءسى – شەتەلدىك. وتكەن جىلى شىنى زاۋىتى ىشىنەن ەنەرگيا ۇنەمدەيتىن شىنى ءوندىرىسىنىڭ جاڭا جەلىسى ىسكە قوسىلعان بولاتىن. قىتايلىق ينۆەستور الداعى ۋاقىتتا 2 كەزەڭگە جوسپارلانعان جاڭا ينۆەستيتسيالىق جوبانى جۇزەگە اسىرماق. ءبىرىنشى كەزەڭدە، ياعني 2026 جىلى جىلىنا 200 مىڭ توننا كۆارتس قۇمىن وڭدەيتىن تسەح، ەكىنشى كەزەڭ – 2028 جىلى تاۋلىگىنە 500 توننا كۇن فوتوەلەكترلىك شىنى ءوندىرىسى اشىلادى.
ايتا كەتەيىك، وبلىستا نەگىزگى كاپيتالعا 640 ملرد. تەڭگە ينۆەستيتسيا تارتىلىپ، ءوسىم 21,7 پايىز بولدى. ونىڭ 70,5 پايىزى – جەكە ينۆەستيتسيا. شەتەل ينۆەستورلارىمەن جۇرگىزىلگەن جۇمىستاردىڭ ارقاسىندا 2024 جىلدىڭ 9 ايىندا 171 ملن. دوللار تىكەلەي ينۆەستيتسيا تارتىلدى. ەكونوميكانى ءارتاراپتاندىرۋ ماقساتىندا وتكەن جىلى 37 ملرد. تەڭگەنىڭ 21 ينۆەستيتسيالىق جوباسى جۇزەگە استى. 2025-2029 جىلدارعا 1 ترلن. 900 ملرد. تەڭگەنىڭ 65 ينۆەستيتسيالىق جوباسى مەجەلەنگەن.
