ەتنيكالىق قازاق، بۇرىنعى اسكەري ۇشقىش نادجيبۋللا ابدۋل حاليل ءوزىن قازاقستان قۇقىق قورعاۋ ورگاندارى ازاماتتىعىنان زاڭسىز ايىرعانىن ايتىپ، ەگەر تۋعان ەلى اۋعانستانعا دەپورتاتسيالانسا، ومىرىنە قاۋىپ ءتونىپ تۇرعانىن مالىمدەدى. بۇل تۋرالى KursivMedia ءتىلشىسى ماسەلەنىڭ ءمان-جايىن ءبىلدى، دەپ حابارلايدى “ادىرنا” ۇلتتىق پورتالى.
نادجيبۋللا ابدۋل ءحاليلدىڭ سوزىنشە، بۇل جاعدايعا ەكس-شەنەۋنىك كارىم ءماسىموۆتىڭ وتباسى سەبەپكەر بولعان.
تالىپتەردەن قاۋىپ جانە 30 جىلدىق ەڭبەك
ابدۋل حاليل 1986 جىلدان باستاپ كەڭەس وداعى تاراپىنان اۋعانستاندا تەرروريزمگە قارسى كۇرەسكە قاتىسقانىن، سول سەبەپتى تاليبان ونى دۇشپان سانايتىنىن ايتتى. 1993 جىلى ەلدەن قاشىپ شىعىپ، تۇرىكمەنستاندا پانالاعان، كەيىن 2000 جىلى قازاقستانعا قونىس اۋدارعان. 2021 جىلى ول جانە وتباسى مۇشەلەرى قازاقستان ازاماتتىعىن العان.
كوكشەتاۋدا اۋىلشارۋاشىلىق سالاسىندا كاسىپ جۇرگىزىپ، 200-دەن استام ادامدى جۇمىسپەن قامتىعان. بىراق 2019 جىلى ونىڭ سوزىنە قاراعاندا، كارىم ءماسىموۆتىڭ اكەسى قاجىمقان ءماسىموۆ كاسىپتى بەرۋدى تالاپ ەتىپ، باس تارتقاننان كەيىن قىسىمدار باستالعان.
«كەزدەسۋدە «نە كاسىبىڭنەن باس تارتاسىڭ، نە سەنىمەن مەنىڭ ۇلىم اينالىسادى» دەپ ايتقان. سول كەزدەن ءبارى قۇردىمعا كەتە باستادى. كارىم ءماسىموۆتىڭ اكەسى
2023 جىلى ابدۋل حاليل قازاقستان ازاماتتىعىنان ايىرىلعان. ال جۋىردا ونىڭ ايەلى مەن بالالارى دا ازاماتتىقسىز قالعان. بيلىك ولاردىڭ قوس ازاماتتىق العانىن دالەل رەتىندە ۇسىنعان، الايدا وتباسى بۇل دەرەكتەر جالعان ەكەنىن ايتادى. ءتىپتى ۇسىنىلعان انىقتاماداعى فوتوسۋرەت الەۋمەتتىك جەلىدەن الىنعانىن دالەلدەگەن.
وتباسىنىڭ ايتۋىنشا، نادجيبۋللاعا قاتىستى 7 قىلمىستىق ءىس قوزعالعان، ەكى جىل قاماۋدا وتىرعان، بىراق ەشقايسىسى دالەلدەنبەگەن. ۇلى ءاليجاننىڭ سوزىنە قاراعاندا، بارلىعى ماسىموۆتەرمەن بايلانىستى جانە قىسىم كاسىپتەن باستالىپ، كەيىن ازاماتتىق پەن بوستاندىققا دەيىن جالعاسقان.
نادجيبۋللا ابدۋل حاليل مەملەكەت باسشىسىنا حات جولداپ، كومەك سۇراپ وتىر. ونىڭ قازىرگى ماقساتى – ءوز قۇقىقتارىن قالپىنا كەلتىرۋ جانە وتباسىمەن بىرگە ەلدە قالۋ.