جىلۋ ماۋسىمىنا دايىندىق. ريددەر جەو-نى جوندەۋگە تاعى دا 1,7 ملرد تەڭگە ءبولىندى

ريددەر قالاسىنداعى جىلۋ ەلەكتر ورتالىعىن (جەو) جوندەۋگە ۇكىمەت رەزەرۆىنەن قوسىمشا 1,7 ملرد تەڭگە ءبولىندى، دەپ حابارلايدى "ادىرنا" ۇلتتىق پورتالى. ءتيىستى قاۋلىعا قازاقستان پرەمەر-ءمينيسترى ولجاس بەكتەنوۆ قول قويدى. اتالعان قاراجات شىعىس قازاقستان وبلىسىنىڭ بيۋدجەتىنە اعىمداعى نىسانالى ترانسفەرت تۇرىندە اۋدارىلادى. قارجى جەو-نىڭ 2025–2026 جىلدارعا ارنالعان جىلىتۋ ماۋسىمىنا تولىققاندى جانە ساپالى دايىندالۋىنا باعىتتالماق. ۇكىمەتتىڭ حابارلاۋىنشا، سوڭعى ەكى جىل ىشىندە ريددەر جەو-عا ءتۇرلى كوزدەردەن جالپى سوماسى 15,5 ملرد تەڭگە بولىنگەن. بۇل قاراجاتقا قازاندىقتار مەن تۋربينالار جوندەلىپ، ستانسانىڭ توزۋ دەڭگەيى 75%-دان 46%-عا دەيىن تومەندەتىلگەن. سونىمەن قاتار 21,3 شاقىرىم جىلۋ جەلىسى جاڭارتىلىپ، ولاردىڭ توزۋى 82%-دان 67%-عا دەيىن ازايعان. دەگەنمەن، 2023–2024 جىلدارداعى جوندەۋ جۇمىستارىنا ەنبەگەن بىرقاتار ماڭىزدى توراپتار مەن مەحانيزمدەر ءالى دە قالپىنا كەلتىرۋدى قاجەت ەتەدى. اتاپ ايتقاندا، قازاندىق اگرەگاتتارى، تۋربواگرەگاتتار، جانە ەلەكترمەن تۇراقتى قامتاماسىز ەتۋگە جاۋاپتى تاراتۋ قۇرىلعىلارى جوندەلەتىن بولادى. «بولىنگەن قارجى ريددەر جەو-نىڭ الداعى جىلىتۋ ماۋسىمىنا دايىندىعىن قامتاماسىز ەتەدى. جوندەۋ جۇمىستارىنىڭ ۋاقتىلى ءارى ساپالى جۇرگىزىلۋى – تۇرعىنداردىڭ قاۋىپسىزدىگى مەن جايلىلىعى ءۇشىن ماڭىزدى»، — دەلىنگەن حابارلامادا.