قازاقستان رەسپۋبليكاسى ۇلتتىق قاۋىپسىزدىك كوميتەتى (ۇقك) الەۋمەتتىك جەلىلەردە تاراعان فەيك اقپارات تۋرالى رەسمي مالىمدەمە جاسادى، دەپ حابارلايدى "ادىرنا" ۇلتتىق پورتالى Kazinform-عا سىلتەپ.
الەۋمەتتىك جەلىلەردە ۇقك ءباسپاسوز قىزمەتىنىڭ اتىنان جاريالانعان جالعان حابارلاما تاراپ كەتكەن. وندا Telegram پلاتفورماسىندا «ماڭگىلىك پولك» اكتسياسىنا قارسى ريتوريكا تاراتۋشىلار، بويكوتقا ۇندەگەندەر جانە قوعامدا الاۋىزدىق تۋعىزاتىن باسقا دا ارەكەتتەرگە بارعان ازاماتتار تۋرالى مالىمەت جينايتىن ارنايى بوت ىسكە قوسىلعانى تۋرالى ايتىلعان.
الايدا، ۆەدومستۆو بۇل اقپاراتتىڭ شىندىققا جاناسپايتىنىن، ياعني فەيك ەكەنىن ناقتىلاپ، مالىمدەمەدە:
«اتالعان "مالىمدەمە" جالعان، ونداعى اقپارات شىندىققا سايكەس كەلمەيدى» – دەپ اتاپ ءوتتى.
ۇقك ازاماتتاردى تەك رەسمي دەرەككوزدەرگە عانا سەنۋگە جانە جالعان حابارلامالاردى تاراتپاۋعا شاقىردى.
