ءۇش اپتا بۇرىن وق جاراقاتىن العان كاسىپكەر، شىمكەنت اكىمىنىڭ ورىنباسارى رۋسلان بەردەنوۆتىڭ اۋرۋحاناداعى فوتوسى پايدا بولدى. فوتونى بەلگىلى كاسىپكەر مارعۇلان سەيسەمباي Facebook-پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
پالاتاداعى كەرەۋەتتە جاتقان بەردەنوۆپەن بەلگىلى كاسىپكەر مارعۇلان سەيسەمباەۆ سۋرەتكە تۇسكەن.
كاسىپكەردىڭ ايتۋىنشا، شىمكەنتكە ساپارى بارىسىندا ول قازىر رۋسلان بەردەنوۆ جاتقان اۋرۋحانادا بولىپ، جارالانعان اكىم ورىنباسارىنا باردى. ايتۋىنشا، بەردەنوۆ ءوزىن جاقسى سەزىنىپ، ايىعىپ جاتىر.
"رۋسلان بەردەنوۆ – ءوزىم تانيتىن جانە ونىڭ ادالدىعى ءۇشىن سىيلاتىن جالعىز ساياساتكەر. جاقىندا وعان قاستاندىق جاسالدى، بىراق، قۇدايعا شۇكىر، ول امان قالدى. قازىر ونىڭ دەنساۋلىعى جاقسى، كوڭىل-كۇيى كوتەرىڭكى. ءبارى ويداعىداي بولعانىنا
وتە قۋانىشتىمىن!" — دەپ جازدى مارعۇلان سەيسەمباەۆ. ەسكە سالساق، 21 ءساۋىر كۇنى ساعات 20:30 شاماسىندا شىمكەنت اكىمدىگى عيماراتىنىڭ جانىندا قالا اكىمىنىڭ ورىنباسارى رۋسلان بەردەنوۆكە قارۋلى شابۋىل جاسالعان بولاتىن. شەنەۋنىك جامباسى مەن يىعىنان وق جاراقاتىن الىپ، اۋرۋحاناعا جاتقىزىلدى. بەردەنوۆكە ءتورت ساعات بويى وتا جاسالعان. دارىگەرلەي ونىڭ ومىرىنە قاۋىپ جوق ەكەنىن ايتتى. پوليتسەيلەر كۇدىكتى ەرنار جيەمبايدى ۇستاپ، ۋاقىتشا ۇستاۋ يزولياتورىنا قامادى. ول قىلمىستىق كودەكسىنىڭ 24-بابى 3-بولىگى (قىلمىستى ىستەۋگە وقتالۋ) جانە 99-بابى 2-بولىگىنىڭ 6-تارماعى (باسقا ادامداردىڭ ومىرىنە قاۋىپتى تاسىلمەن جاسالعان كىسى ولتىرۋگە وقتالۋ) بويىنشا تەرگەلىپ جاتىر.
