الماتىنىڭ ەكس-اكىمى باۋىرجان بايبەكتىڭ كلانى ەلدوس قوسپاەۆ باسقارعان ۇيىمداسقان قىلمىستىق توپتىڭ (ۇقت) قىلمىستىق سحەمالارىنا بەلسەندى قاتىسقان، دەپ حابارلايدى "ادىرنا" ۇلتتىق پورتالى قازتاگ-قا سىلتەمە جاساپ.
«قوسپاەۆ ە. جانە ونىڭ ۇيىمداسقان توبىنىڭ مۇشەلەرى 2019 جىلعى 8 ءساۋىر مەن 2020 جىلعى 23 جەلتوقسان ارالىعىندا «AV-Construction» جشس-ءنىڭ مۇلكىن يەمدەنىپ، وزدەرىنە سەنىپ تاپسىرىلعان جىلجىمايتىن مۇلىك نىساندارىن وزىندىك قۇنىنان تومەن باعامەن ءۇشىنشى تۇلعالارعا ساتىپ جىبەرۋ ارقىلى كاسىپورىن مەن ونىڭ زاڭدى يەلەرىنە زيان كەلتىرگەن. اتاپ ايتقاندا، ابيجانوۆ د.، تاناشەۆ ت. جانە باباەۆ ر. ۇيىمداسقان توپ جەتەكشىسى كوسپاەۆ ە. جانە باسقا دا تۇلعالارمەن كەلىسىپ، پايدالانۋعا بەرىلگەن جانە سالىنىپ جاتقان بىرقاتار نىسانداردى الماتى قالاسىنىڭ سول كەزدەگى اكىمى بايبەك ب.-ءنىڭ اكەسى بايبەك ق.-عا وزىندىك قۇنىنان تومەن باعامەن ساتۋ تۋرالى شەشىم قابىلداعان. بۇل كاسىپورىن مەن ونىڭ زاڭدى يەلەرىنە تىكەلەي زيان كەلتىرگەن»، – دەلىنگەن كوسپاەۆتىڭ ۇقت-سىنا قاتىستى سوت ۇكىمىندە.
وسىدان كەيىن ابيجانوۆ د.، تاناشەۆ ت. جانە باباەۆ ر. ەلدوس كوسپاەۆ جانە ەكس-اكىم باۋىرجان بايبەكتىڭ اكەسىنىڭ مۇددەسىن كوزدەيتىن وزگە ءبىر تۇلعامەن كەلىسە وتىرىپ، ۇرلانۋعا تاڭدالعان ءۇش نىساننىڭ باعاسىن انىقتاعان. بۇل نىساندار باۋىرجان بايبەكتىڭ تۋىسى بايبەك ق.-نىڭ اتىنا ساتىلعان. باعاسى – 1 شارشى مەتر ءۇشىن 230 مىڭنان 425 مىڭ تەڭگەگە دەيىن، ياعني قۇرىلىس قۇنىنان ەداۋىر تومەن بولعان.
2019 جىلدىڭ ساۋىرىندە ۇيىمداسقان قىلمىستىق توپتىڭ جەتەكشىسى ەلدوس قوسپاەۆ الماتىدا ورنالاسقان «AV-Construction» كومپانياسىنىڭ كەڭسەسىندە وتىرىپ، ءوز توبىنىڭ مۇشەسى باباەۆقا پاتەر ساتۋ تۋرالى تاپسىرما بەرەدى. بۇل پاتەر — الماتى قالاسى، كاپپاروۆ كوشەسى، №116/9 ۇيدە ورنالاسقان. جالپى اۋدانى 114,7 شارشى مەتر.
پاتەر نارىقتاعى قۇنىنان الدەقايدا تومەن — 43,6 ميلليون تەڭگەگە ساتىلۋى ءتيىس بولعان. بۇل باعا قۇرىلىس شىعىندارىن دا جاپپايدى. پاتەردى ساتىپ الۋشى — سول كەزدەگى الماتى قالاسىنىڭ اكىمى باۋىرجان بايبەكتىڭ اكەسى.
سول كۇنى باباەۆ قوسپاەۆتىڭ تاپسىرماسىمەن پاتەردى تومەن باعامەن قىدىرعالي بايبەككە ساتقان كەلىسىمشارتقا قول قويادى. مۇنداي مامىلە كاسىپورىنعا اسا ءىرى كولەمدە شىعىن كەلتىرگەن جانە زاڭدى يەلەرىنىڭ مۇددەسىنە قايشى بولعان.
«وسىلايشا، ەلدوس قوسپاەۆ پەن ونىڭ ۇيىمداسقان قىلمىستىق توبىنىڭ مۇشەلەرى، تاناشەۆ ت.، ابيجانوۆ د.، باباەۆ ر. جانە باسقا تۇلعالار، كاسىپورىننىڭ مۇلكىن اسا ءىرى مولشەردە ىسىراپ ەتكەن. ولار ونى ءۇشىنشى تۇلعالارعا قۇنى الدەقايدا تومەن باعاعا ساتقان. قوسپاەۆ پەن ونىڭ توبىنىڭ قىلمىستىق ارەكەتتەرى كاسىپورىنعا جانە ونىڭ زاڭدى مەنشىك يەلەرىنە 65 946 191 تەڭگە كولەمىندە زالال كەلتىردى»، — دەلىنگەن سوت ۇكىمىندە.
ەسكە سالا كەتەيىك، 2022 جىلى قىركۇيەكتە بايبەككە قاتىستى قىلمىستىق ءىس قوزعالعانى تۋرالى حابارلار شىقتى. ال 2023 جىلدىڭ قاڭتار ايىندا ونى گەرمانيانىڭ ليۋبەك قالاسىندا كورگەن. 2023 جىلدىڭ قازانىندا قازاقستان پرەزيدەنتى قاسىم-جومارت توقاەۆ بايبەكتىڭ بۇرىنعى جۇبايى جانار بايبەكتى استانا سوتىنان جۇمىستان شىعارعانى تۋرالى حابارلاندى.
