14 مامىر كۇنى حالىقارالىق «ۇلى دالا جورىعى-2025» مارافون-بايگەسى مارەسىنە جەتتى. الماتى وبلىسى ىلە اۋدانى اقشي اۋىلى ماڭىنان باستالعان جورىق بەس كۇن بويى جالعاسىپ، قوناەۆ قالاسىندا ءوز مارەسىنە جەتتى. جورىق جولى 500 شاقىرىمدى قۇراپ، ناعىز توزىمدىلىك پەن شەبەرلىكتى تالاپ ەتتى.
جەڭىمپازدار ۇشتىگى مىناداي بولدى:
1.استانا قالاسى – 31:19:05
2.قىرعىز رەسپۋبليكاسىنىڭ ءى كومانداسى – 32:26:57
3.ۇلىتاۋ وبلىسى – 32:33:00
ۇلىتاۋلىقتار – ۇلى رۋحتىڭ يەلەرى
ۇلىتاۋ وبلىسىنىڭ كومانداسى بيىلعى جارىستا ەرەكشە كوزگە ءتۇستى. بەس كۇندىك جورىقتا ولار دالانىڭ قيىن جولىن باعىندىرىپ، تاباندىلىق پەن توزىمدىلىكتىڭ ناعىز ۇلگىسىن كورسەتتى. بۇل — تەك سپورتتىق جەتىستىك ەمەس، ۇلىتاۋدىڭ تاريحي-مادەني رۋحىن قايتا جاڭعىرتۋ، ۇرپاققا ۇلگى ەتۋ جولىنداعى ۇلكەن قادام.
كوماندانىڭ جەتەكشىسى تەمىربەكوۆ داۋرەن جورىقتىڭ اۋىرلىعىن بىلاي سيپاتتادى:
«بۇل بەس كۇن اتتار ءۇشىن دە، شاباندوزدار ءۇشىن دە وڭايعا تۇسكەن جوق. قيىرشىق تاستى جولدارمەن ءجۇرىپ وتتىك، ءشول دالانى ارتقا تاستادىق، قۇمدى داۋىلعا تاپ بولدىق. اراسىندا سىركىرەگەن جاۋىننىڭ استىندا قالدىق. بىراق سوعان قاراماستان، جىگىتتەر دە، تۇلپارلار دا بەرىلمەدى. بۇل – رۋحتىڭ جەڭىسى»، – دەيدى ول.
ۇلىتاۋ نامىسىن قورعاعان شاباندوزدار:
•بەكتاەۆ عالىمجان
•ورازعاليەۆ جاقسىلىق
•ابدولۇلى ماعجان
•مۇحامەدجان تۇراق
•ابەنوۆ مەدەت
ولار تابيعاتتىڭ توسىن مىنەزى مەن جول ازابىنا مويىمادى. ءار شاقىرىم سايىن ەرلىك پەن ەڭبەكتىڭ، ءتارتىپ پەن توزىمدىلىكتىڭ سىنىنان ءوتتى.
ۇقساس جاڭالىقتار
