«قازاقمىس» كورپوراتسياسى مەن شەتەلدىك China National Chemical Engineering (CNCEC) كومپانياسى جەزقازعان مىس بالقىتۋ زاۋىتىندا جاڭا كۇكىرت قىشقىلى تسەحىن سالۋ تۋرالى مەموراندۋمعا قول قويدى.
ماڭىزدى قۇجاتقا قول قويۋ راسىمىنە ۇلىتاۋ وبلىسىنىڭ اكىمى ەسەت بايكەن، «قازاقمىس» كورپوراتسياسى» جشس باسقارما توراعاسى رۋسلان وسكەنالى جانە CNCEC ديرەكتورلار كەڭەسىنىڭ توراعاسى باو گۋاندۋن قاتىستى.
ينۆەستيتسيالىق جوبانىڭ جالپى قۇنى 213,76 ملن اقش دوللارىن قۇرايدى. جوبانى ىسكە اسىرۋ كاسىپورىندى ەكولوگيالىق جانە تەحنولوگيالىق جاڭعىرتۋدىڭ ماڭىزدى كەزەڭدەرىنىڭ بىرىنە اينالىپ، جەزقازعان قالاسىنا تۇسەتىن ەكولوگيالىق جۇكتەمەنى ەداۋىر تومەندەتۋگە مۇمكىندىك بەرەدى.
«بۇل – جەزقازعانداعى ەكولوگيالىق جاعدايدى جاقسارتۋعا، شىعارىندىلاردى ازايتۋعا جانە ءوڭىردىڭ وندىرىستىك الەۋەتىن نىعايتۋعا باعىتتالعان اۋقىمدى جوبا. جوبا ۇكىمەتتىڭ قولداۋىمەن مەملەكەت باسشىسى قاسىم-جومارت كەمەلۇلى توقاەۆتىڭ ۇلىتاۋ ءوڭىرىن دامىتۋ جونىندەگى تاپسىرمالارىن ىسكە اسىرۋ اياسىندا جۇزەگە اسىرىلۋدا»، – دەدى ۇلىتاۋ وبلىسىنىڭ اكىمى ەسەت بايكەن.
جوبا جاڭا كۇكىرت قىشقىلى ءوندىرىسىن سالۋمەن قاتار، تەحنولوگيالىق گازداردى ۇستاۋ جانە تازارتۋ جۇيەسىن جاڭعىرتۋدى كوزدەيدى. جاڭا جۇيە تەحنولوگيالىق پروتسەستەردى اۆتوماتتاندىرۋ مەن باقىلاۋدىڭ زاماناۋي قۇرالدارىمەن جابدىقتالادى.
جوبا ىسكە اسىرىلعاننان كەيىن تەحنولوگيالىق گازداردى ۇستاۋ دەڭگەيى 99%-عا دەيىن جەتەدى. بۇل ءوندىرىس شىعارىندىلارىن ايتارلىقتاي ازايتىپ، قورشاعان ورتاعا تۇسەتىن اسەردى تومەندەتۋگە مۇمكىندىك بەرەدى.
نىساندى پايدالانۋعا بەرۋ 2028 جىلعا جوسپارلانىپ وتىر.
