ۇلىبريتانيادا قازاقستاننىڭ بۇرىنعى ۇلتتىق قاۋىپسىزدىك كوميتەتى توراعاسى كارىم ماسىموۆپەن بايلانىسى بار دەپ سانالاتىن كاسىپكەر ايگۇل نۇريەۆاعا قاتىستى تەرگەۋ باستالدى. ول بريتان پارلامەنتىنىڭ دەپۋتاتى مارگارەت حودجدىڭ «لاس اقشامەن كۇرەس» باستاماسى اياسىندا نازارعا ءىلىندى، دەپ حابارلايدى "ادىرنا" ۇلتتىق پورتالى جاس الاشقا سىلتەپ.
ايگۇل نۇريەۆا – قازاقستانداعى ىقپالدى بيزنەسمەندەردىڭ ءبىرى. بۇرىن ول «قازاقتەلەكوم» جانە بىرقاتار تەلەكوممۋنيكاتسيالىق كومپانيالاردا ۇلەسكە يە بولعان. تەرگەۋ ماتەريالدارىنا سايكەس، نۇريەۆا لوندونداعى ەليتالىق Regent’s Park اۋدانىندا جالپى قۇنى 12 ميلليون فۋنت ستەرلينگتى قۇرايتىن ەكى پاتەر ساتىپ الىپ، ولاردى بىرىكتىرىپ جوندەۋ جۇمىستارىن باستاعان.
مارگارەت حودج نۇريەۆانى «حودج تىزىمىنە» ەنگىزىپ، ونىڭ اكتيۆتەرىنىڭ زاڭدىلىعىن تەرگەپ-تەكسەرۋدى تالاپ ەتتى. بۇل تىزىمدە سونداي-اق قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ تۋىستارى مەن باسقا دا ىقپالدى تۇلعالار بار. دەپۋتاتتىڭ ايتۋىنشا، بۇل اكتيۆتەردىڭ شىعۋ تەگى كۇمان تۋدىرىپ، ۇلىبريتانيانىڭ قارجىلىق قاۋىپسىزدىگىنە نۇقسان كەلتىرۋى مۇمكىن.
نۇريەۆا مەن ءماسىموۆتىڭ بايلانىسى بۇعان دەيىن دە باق-تا تالقىلانعان. كارىم ءماسىموۆ پرەمەر-مينيستر قىزمەتىن اتقارعان جىلدارى نۇريەۆا شەتەلدىك كومپانيالارمەن، ونىڭ ىشىندە شۆەدتىك TeliaSonera كومپانياسىمەن جاسالعان كەلىسسوزدەردە دەلدال ءرولىن اتقارعان بولۋى مۇمكىن.
قازىرگى ۋاقىتتا ايگۇل نۇريەۆا ۇلىبريتانيادا تۇرادى. ونىڭ مۇلكىنە قاتىستى تەرگەۋ ءالى جالعاسۋدا.
ۇلىبريتانيا: "قازاق ەلى ءوز مۇناي-گازىن جاڭا باعىتتارمەن ەكسپورتتاي الۋى ءۇشىن كومەكتەسۋگە دايىنبىز"
