قازاقستاندا نەگىزگى ۇلتتىق بىرىڭعاي تەستىلەۋ (ۇبت) 16 مامىردان باستالىپ، 7 شىلدەگە دەيىن جالعاسادى. بۇل تۋرالى عىلىم جانە جوعارى ءبىلىم مينيسترلىگى مالىمدەدى، دەپ حابارلايدى “ادىرنا”.
بۇل جىلى تالاپكەرلەر تەستى ەكى رەت تاپسىرىپ، ەڭ جاقسى ناتيجەسىن گرانتتار بايقاۋىنا قاتىسۋ ءۇشىن تاڭداي الادى.
تەستىلەۋگە 216 مىڭعا جۋىق تالاپكەر ءوتىنىش بەردى، بۇل وتكەن جىلمەن سالىستىرعاندا 30 مىڭ ادامعا كوپ. ەكى مۇمكىندىكتى ەسكەرسەك، وتىنىشتەر سانى 399 مىڭعا جەتتى. قاتىسۋشىلاردىڭ باسىم بولىگى – 75%-ى تەستىلەۋدى قازاق تىلىندە تاپسىرسا، 25%-ى ورىس تىلىندە، 266 ادام اعىلشىن تىلىندە تاپسىرعان.
ەڭ تانىمال ءپروفيلدى پاندەر كومبيناتسياسى – "ماتەماتيكا – فيزيكا", ونى 16,5% ءبىتىرۋشى تاڭداپ وتىر. ۇشتىكتە تاعى "بيولوگيا – حيميا" (15,6%) جانە "ماتەماتيكا – ينفورماتيكا" (9,7%) پاندەرى بار.
تەستىلەۋ ەلىمىزدىڭ 46 پۋنكتىندە وتەدى. العاشقى كۇنى 4589 ادام تەست تاپسىرادى، ونىڭ 323-ءى استانا قالاسىندا. ەكزامەن 120 سۇراقتان تۇرادى جانە ءتورت ساعاتقا سوزىلادى. ارنايى ءبىلىم بەرۋ قاجەتتىلىكتەرى بار قاتىسۋشىلارعا قوسىمشا 40 مينۋت بەرىلەدى.
ەرەجەلەردىڭ بۇزىلۋىنا جول بەرمەۋ ءۇشىن كىرەبەرىستەرگە مەتالل ىزدەگىشتەر ورناتىلدى، اۋديتوريالاردا ءموبيلدى بايلانىس بلوكتايتىن قۇرىلعىلار مەن بەينەباقىلاۋ كامەرالارى ورناتىلدى. تەستىلەۋ اياقتالعاننان كەيىن 31 قازانعا دەيىن بەينەمازمۇن تالدانىپ، ەرەجەلەر بۇزىلعان جاعدايدا ناتيجەلەر جويىلادى.
ۇبت ناتيجەلەرى بار سەرتيفيكاتتار قاتىسۋشىلاردىڭ جەكە كابينەتتەرىندە اپەللياتسيالاردى قاراۋ اياقتالعاننان كەيىن قولجەتىمدى بولادى. تەست مازمۇنىنا قاتىستى اپەللياتسيانى ەمتيحان اياقتالعاننان كەيىن 30 مينۋت ىشىندە بەرۋگە بولادى.
