الماتىدا وتكەن جىلى بولعان جاس ستۋدەنت اقنار ءحاميتتىڭ قازاسى قوعام نازارىن اۋدارتقان قايعىلى وقيعالاردىڭ بىرىنە اينالدى. 22 جاستاعى دارىندى قىزدىڭ ولىمىنە قاتىستى جانتۇرشىگەرلىك دەرەكتەر پايدا بولىپ، ءىس بويىنشا تۋىستارى ءادىل تەرگەۋ جۇرگىزىلمەي جاتقانىن العا تارتۋدا، دەر حابارلايدى “ادىرنا” ۇلتتىق پورتالى.
بىلتىر شىلدە ايىندا تۇنگى ساعات 02:54 شاماسىندا اقنار حاميت الماتىداعى Amir تۇرعىن ءۇي كەشەنىنىڭ 7-قاباتىنان قۇلاپ، اۋىر جاراقاتپەن اۋرۋحاناعا جەتكىزىلەدى. دارىگەرلەر ونىڭ ءومىرىن ساقتاپ قالا المادى. رەسمي مالىمەتتەرگە سايكەس، قىلمىستىق ءىس قر قك 105-بابى 1-بولىگى – «ءوزىن-ءوزى ولتىرۋگە دەيىن جەتكىزۋ» بويىنشا قوزعالعان.
الايدا، مارقۇمنىڭ اناسى گۇلىستان حاميت قىزىنىڭ ولىمىنە وزگە ادامداردىڭ قاتىسى بار دەپ ەسەپتەيدى. ونىڭ ايتۋىنشا، اقناردىڭ دەنەسىنەن ازاپتاۋ بەلگىلەرى انىقتالعان. موينىندا قىلقىندىرۋ ىزدەرى، كەڭىردەگىندە تىرنالعان جەرلەر، تىرناق پەن شاش جۇلىنعان. اناسىنىڭ ايتۋىنشا، بۇل قىزدىڭ سوڭعى ساتتەرىندە قاتتى ازاپ شەككەنىن كورسەتەدى.
اقناردى ءولىم تۇنىندە پاتەرگە ر. جانە د. ەسىمدى ەكى قىز الداپ شاقىرعان. قىزدار وزدەرىن تاۋار الۋشى رەتىندە كورسەتىپ، WeChat مەسسەنجەرىندە ارنايى توپ قۇرىپ، اقناردەن كيىم-كەشەك اكەلۋدى سۇراعان. ول ساۋدامەن اينالىساتىن بولعان. سول ءتۇنى اقنار كەشكى 19:40-تا پاتەرگە كىرىپ، تۇنگى 02:54-تە تەرەزەدەن قۇلايدى.
مارقۇمنىڭ اناسى سول ەكى قىزدىڭ قىزىن تەرەزەدەن يتەرىپ جىبەرگەنىنە سەنىمدى. ونىڭ ايتۋىنشا، بۇل تۋرالى بەينەجازبانى دا ءوز بەتىمەن تاۋىپ، تەرگەۋ ورگاندارىنا تاپسىرعان. بىراق تەرگەۋ ءالى ناتيجە بەرمەگەن. كۇدىكتى رەتىندە اتالعان ەكى قىز ۋاقىتشا قاماۋعا الىنۋ تۋرالى قاۋلىعا قاراماستان، بوستاندىقتا جۇرگەن كورىنەدى.
«قازىرگى ۋاقىتتا بولعان وقيعانىڭ تولىق كورىنىسىن انىقتاۋ ءۇشىن جان-جاقتى تەرگەۋ ءجۇرىپ جاتىر. تەرگەۋ شەڭبەرىندە ماتەريالدار جيناقتالىپ، تالدانۋدا، كۋالاردان جاۋاپ الىنۋدا، بەينەجازبالار زەردەلەنۋدە، زاڭدا كوزدەلگەن باسقا دا ءىس جۇرگىزۋ ارەكەتتەرى ورىندالۋدا. تەرگەۋ بارىسى دەپارتامەنت باسشىلىعىنىڭ ەرەكشە باقىلاۋىندا. ونىڭ ناتيجەلەرى بويىنشا قولدانىستاعى زاڭناما اياسىندا شەشىم قابىلداناتىن بولادى»، - دەدى الماتى قالالىق پوليتسيا دەپارتامەنتىنىڭ وكىلى.
گۇلىستان حاميت تەرگەۋدىڭ ساپاسىنا، ادىلەتسىزدىككە جانە ىستەعى كۇماندى شەشىمدەرگە نارازىلىق ءبىلدىرىپ وتىر. ونىڭ ايتۋىنشا، بۇرىنعى تەرگەۋشى ءمايىتتىڭ جاراقاتتارىن كورسەتەتىن فوتولاردى ساراپتاماعا تاپسىرماعان. پسيحولوگيالىق ساراپتاما دا اناسىنىڭ بەرگەن ماتەريالدارىن ەسكەرمەگەن. تەرگەۋ بارىسىندا USB فلەشكا "اشىلماي قالدى" دەگەن سىلتاۋ ايتىلعان.
سونىمەن قاتار، ول 20 شىلدە كۇنى تاڭعى ساعات 11-دە قىزداردىڭ ءبىرىنىڭ 8 ملن تەڭگەنى Kaspi بانكىنىڭ بولىمشەسىنەن شەشىپ العانى تۋرالى دەرەككە دە پوليتسيا تاراپىنان رەسمي جاۋاپ بەرىلمەگەنىن ايتادى. بۇل جايت تەرگەۋگە كەدەرگى كەلتىرەتىن جەمقورلىق فاكتورلارى بولۋى مۇمكىن دەگەن كۇدىك تۋدىرعان.
اقنار حاميت – قىتايدان قازاقستانعا كوشىپ كەلگەن وتباسىنان شىققان، ونەرلى ءارى ءبىلىمدى بويجەتكەن. ول كيمەپ ۋنيۆەرسيتەتىندە وقىعان، بىرنەشە شەت ءتىلىن مەڭگەرىپ، حالىقارالىق كومپانيالاردا جۇمىس ىستەگەن. مۋزىكا مەن كينو سالاسىندا دا تانىلعان. بەلسەندى، ارمانى اسقاق، ەڭبەكقور قىز بولعانىن دوستارى مەن ۇستازدارى ەسكە الادى.
قايعىدان قان جۇتقان اناسى اقناردىڭ ولىمىنە بايلانىستى قىلمىستىق ءىستىڭ «ءوزىن-ءوزى ولتىرۋگە جەتكىزۋ» ەمەس، «ادام ءولتىرۋ» جانە «ازاپتاۋ» باپتارى بويىنشا قايتا سارالانۋىن تالاپ ەتۋدە. ول ءىىم-گە، باس پروكۋراتۋراعا، پرەزيدەنت اكىمشىلىگىنە بىرنەشە مارتە حات جولداپ، ءىستىڭ ءادىل قارالۋىن سۇراعان.
بۇگىندە ءىس الماتى قالالىق پوليتسيا دەپارتامەنتىنىڭ قاراۋىندا. رەسمي ورگاندار تەرگەۋ ءجۇرىپ جاتقانىن، بارلىق ماتەريالدار جيناقتالىپ، تالدانىپ جاتقانىن ايتقانىمەن، ناقتى ناتيجە جوق.
