الماتىدا تانىستار اراسىنداعى جانجالدىڭ سوڭى وق اتۋمەن اياقتالدى، دەپ حابارلايدى "ادىرنا" ۇلتتىق پورتالى.
الماتى قالالىق پوليتسيا دەپارتامەنتىنىڭ مالىمەتىنشە، اتىس مەگاپوليستەگى ويىن-ساۋىق ورىندارىنىڭ بىرىندە بولعان. تانىستار اراسىندا جانجال شىعىپ، سالدارىنان ەر ادامداردىڭ ءبىرى قارسىلاسىنا وق اتىپ، ونىڭ اياعىنا تيگىزگەن.
"بۇل فاكتى بويىنشا الاتاۋ اۋداندىق پوليتسيا باسقارماسى تراۆماتيكالىق قارۋ قولدانۋ دەرەگىمەن قىلمىستىق ءىس قوزعادى. 35 جاستاعى جەتىسۋ وبلىسىنىڭ تۋماسى كۇدىكتى رەتىندە ۇستالىپ، ۋاقىتشا ۇستاۋ يزولياتورىنا قامالدى. قارۋ تاركىلەندى", – دەپ حابارلادى پوليتسيا وكىلدەرى.
