قازاقستان پروكۋراتۋراسى جۋرناليست ايدوس سادىقوۆتىڭ قازاسىنا قاتىسى بار دەلىنگەن كۇدىكتىنى بوساتا سالعان. بۇل تۋرالى مارقۇمنىڭ جۇبايى ناتاليا سادىقوۆا حابارلادى، دەپ جازادى قازاقستاننىڭ ادام قۇقىقتارى جانە زاڭدىلىقتى ساقتاۋ جونىندەگى حالىقارالىق بيۋروسى.
سادىقوۆانىڭ ايتۋىنشا، ۋكراينا باس پروكۋراتۋراسى قازاقستان تاراپىنان رەسمي جاۋاپ العان. وندا التاي جاقانباەۆ پەن مەيرام قاراتاەۆقا قاتىستى تەرگەۋ امالدارىن، سونىڭ ىشىندە جاۋاپ الۋدى جۇرگىزۋدەن «دالەلدەردىڭ جەتكىلىكسىزدىگىنە» بايلانىستى باس تارتىلعانى كورسەتىلگەن.
الايدا ناتاليا سادىقوۆا كەرىسىنشە، ۋكراينادا (جۋرناليستكە قاستاندىق كيەۆتە جاسالعان — رەد.) جاقانباەۆ پەن قاراتاەۆتىڭ سادىقوۆتى ولتىرگەنىن دالەلدەيتىن ماتەريالدار وتە كوپ ەكەنىن العا تارتادى. ونىڭ ايتۋىنشا، بۇل دالەلدەر قازاقستان جاعىنا دا بەرىلگەن.
سادىقوۆا سونىمەن قاتار جاقانباەۆتى سوتتىڭ ەشقايدا كەتپەۋ تۋرالى قولحاتپەن بوساتقانىن، ال قاراتاەۆتى مۇلدە ىزدەمەگەنىن ايتتى. ول بۇل جاعدايدى «قازاق بيلىگى قىلمىسكەرلەردى جاسىرىپ وتىر» دەپ باعالادى.
ايدوس سادىقوۆ – ميلليونداعان اۋديتورياسى بار «باسە» YouTube ارناسىنىڭ اۆتورى. ول
وعان 2024 جىلعى 18 ماۋسىمدا كيەۆتىڭ شەۆچەنكو اۋدانىندا بەلگىسىز ادام وق اتقان. سادىقوۆقا وپەراتسيا جاسالعانىمەن، ەكى اپتادان سوڭ اۋرۋحانادا قايتىس بولدى.
19 ماۋسىمدا قازاقستان پرەزيدەنتى قاسىم-جومارت توقاەۆ بۇل قىلمىستى تەرگەۋگە كومەك كورسەتۋگە دايىن ەكەنىن مالىمدەدى. ارتىنشا ۋكراينا پوليتسياسى كۇدىكتىلەردى انىقتادى — ولار قازاقستان ازاماتتارى التاي جاقانباەۆ پەن مەيرام قاراتاەۆ بولىپ شىقتى. قىلمىستان كەيىن ولار ۋكراينادان شىعىپ كەتكەن.
22 ماۋسىمدا قازاقستان باس پروكۋراتۋراسى جاقانباەۆتىڭ ۇستالعانىن، ونىڭ ءوز ەركىمەن ىشكى ىستەر بولىمىنە بارعانىن حابارلادى. ال مەيرام قاراتاەۆ ءالى كۇنگە دەيىن ىزدەۋدە.
بەلگىلى بولعانداي، مەيرام قاراتاەۆ بۇعان دەيىن پوليتسيادا قىزمەت ەتكەن. «رەسپۋبليكا» ينتەرنەت-باسىلىمى ەكىنشى كۇدىكتى جاقانباەۆتىڭ دا قازاقستاننىڭ كۇش قۇرىلىمدارىمەن بايلانىسى بولعانىن انىقتاعان.
