Qazaqstan prokuraturasy jurnalist Aidos Sadyqovtyŋ qazasyna qatysy bar delıngen küdıktını bosata salǧan. Būl turaly marqūmnyŋ jūbaiy Natalia Sadyqova habarlady, dep jazady Qazaqstannyŋ Adam qūqyqtary jäne zaŋdylyqty saqtau jönındegı halyqaralyq biurosy.
Sadyqovanyŋ aituynşa, Ukraina Bas prokuraturasy Qazaqstan tarapynan resmi jauap alǧan. Onda Altai Jaqanbaev pen Meiram Qarataevqa qatysty tergeu amaldaryn, sonyŋ ışınde jauap aludy jürgızuden «dälelderdıŋ jetkılıksızdıgıne» bailanysty bas tartylǧany körsetılgen.
Alaida Natalia Sadyqova kerısınşe, Ukrainada (jurnalistke qastandyq Kievte jasalǧan — red.) Jaqanbaev pen Qarataevtyŋ Sadyqovty öltırgenın däleldeitın materialdar öte köp ekenın alǧa tartady. Onyŋ aituynşa, būl dälelder Qazaqstan jaǧyna da berılgen.
Sadyqova sonymen qatar Jaqanbaevty sottyŋ eşqaida ketpeu turaly qolhatpen bosatqanyn, al Qarataevty mülde ızdemegenın aitty. Ol būl jaǧdaidy «Qazaq bilıgı qylmyskerlerdı jasyryp otyr» dep baǧalady.
Aidos Sadyqov – milliondaǧan auditoriiasy bar «Bäse» YouTube arnasynyŋ avtory. Ol 2014 jyldan bastap otbasymen bırge Ukrainada tūrǧan. Qazaqstanda oǧan äleumettık, ūlttyq nemese dıni arazdyq qozdyrdy degen aiyppen ızdeu jariialanǧan bolatyn.
Oǧan 2024 jylǧy 18 mausymda Kievtıŋ Şevchenko audanynda belgısız adam oq atqan. Sadyqovqa operasiia jasalǧanymen, ekı aptadan soŋ auruhanada qaitys boldy.
19 mausymda Qazaqstan prezidentı Qasym-Jomart Toqaev būl qylmysty tergeuge kömek körsetuge daiyn ekenın mälımdedı. Artynşa Ukraina polisiiasy küdıktılerdı anyqtady — olar Qazaqstan azamattary Altai Jaqanbaev pen Meiram Qarataev bolyp şyqty. Qylmystan keiın olar Ukrainadan şyǧyp ketken.
22 mausymda Qazaqstan Bas prokuraturasy Jaqanbaevtyŋ ūstalǧanyn, onyŋ öz erkımen ışkı ıster bölımıne barǧanyn habarlady. Al Meiram Qarataev älı künge deiın ızdeude.
Belgılı bolǧandai, Meiram Qarataev būǧan deiın polisiiada qyzmet etken. «Respublika» internet-basylymy ekınşı küdıktı Jaqanbaevtyŋ da Qazaqstannyŋ küş qūrylymdarymen bailanysy bolǧanyn anyqtaǧan.
