گارۆارد ۋنيۆەرسيتەتىندە قازاقستاننىڭ 7 ازاماتى وقىپ جاتىر. بۇل تۋرالى عىلىم جانە جوعارى ءبىلىم مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، 7 ادام دا «بولاشاق» باعدارلاماسىمەن وقۋعا تۇسكەن.
«باسقا باعدارلامالار نەمەسە ءوز قاراجاتىنا وقىپ جاتقان ستۋدەنتتەر تۋرالى مالىمەت بىزدە جوق»، — دەلىنگەن مينيسترلىك تاراتقان حابارلامادا
ايتا كەتەيىك، بۇعان دەيىن دونالد ترامپ اكىمشىلىگى گارۆارد ۋنيۆەرسيتەتىنە شەتەل ستۋدەنتتەرىن قابىلداۋعا جانە وقىتۋعا تىيىم سالعانىن حابارلادىق.
اقش-تىڭ ىشكى قاۋىپسىزدىك ءمينيسترى كريستي نوەم گارۆارد ۋنيۆەرسيتەتىنىڭ ستۋدەنتتەرمەن الماسۋ باعدارلامالارىن جۇزەگە اسىرۋعا ارنالعان سەرتيفيكاتىنىڭ كۇشىن جويۋ تۋرالى بۇيرىق بەرگەن ەدى. امەريكادا وقۋدى جوسپارلاعان شەتەلدىكتەر F نەمەسە M ساناتىنداعى ۆيزا الۋى ءتيىس. مۇنداي ۆيزالاردى تەك شەتەلدىك ستۋدەنتتەر مەن الماسۋ باعدارلامالارى قاتىسۋشىلارىن قابىلداۋعا سەرتيفيكاتتالعان وقۋ ورىندارى (SEVP) عانا راسىمدەي الادى.
بۇل ەندى گارۆارد ۋنيۆەرسيتەتى شەتەلدىك ستۋدەنتتەردى قابىلداي المايدى دەگەندى بىلدىرەدى. قازىرگى ۋاقىتتا گارۆاردتا وقىپ جۇرگەن شەتەلدىك ستۋدەنتتەر باسقا ۋنيۆەرسيتەتكە اۋىسۋعا ءماجبۇر بولادى، ايتپەسە ەلدە قالۋ قۇقىعىنان ايىرىلادى.
«اكىمشىلىك گارۆاردتى زورلىق-زومبىلىقتى ورشىتۋگە، انتيسەميتيزمگە جانە قىتايدىڭ كوممۋنيستىك پارتياسىمەن بايلانىس ورناتۋعا جاۋاپتى دەپ سانايدى»، — دەدى كريستي نوەم.
ول سونداي-اق ۋنيۆەرسيتەتتەر ءۇشىن «شەتەلدىك ستۋدەنتتەردى قابىلداۋ — قۇقىق ەمەس، ارتىقشىلىق» جانە «ولار وقۋ اقىسىنىڭ جوعارى بولۋىنان پايدا كورىپ وتىر» دەپ اتاپ ءوتتى.
بۇل وزگەرىس قازاقستاننىڭ جەتى ازاماتىنا قالاي اسەر ەتەتىنى بەلگىسىز. ولار باسقا وقۋ ورنىنا اۋىسۋى دا مۇمكىن. ءسىم ازىرگە ەشنارسە ايتپادى.
2024-2025 جىلى گارۆارد ۋنيۆەرسيتەتى 6800 شەتەل ستۋدەنتىن قابىلداعان. بۇل وسىنداعى جالپى ستۋدەنتتەردىڭ 27,2 پايىزىن قۇرايدى.
