Garvard universitetınde Qazaqstannyŋ 7 azamaty oqyp jatyr. Būl turaly Ǧylym jäne joǧary bılım ministrlıgı mälımdedı, dep habarlaidy “Adyrna” ūlttyq portaly.
Aqparatqa säikes, 7 adam da «Bolaşaq» baǧdarlamasymen oquǧa tüsken.
«Basqa baǧdarlamalar nemese öz qarajatyna oqyp jatqan studentter turaly mälımet bızde joq», — delıngen ministrlık taratqan habarlamada
Aita keteiık, būǧan deiın Donald Tramp äkımşılıgı Garvard universitetıne şetel studentterın qabyldauǧa jäne oqytuǧa tyiym salǧanyn habarladyq.
AQŞ-tyŋ ışkı qauıpsızdık ministrı Kristi Noem Garvard universitetınıŋ studenttermen almasu baǧdarlamalaryn jüzege asyruǧa arnalǧan sertifikatynyŋ küşın joiu turaly būiryq bergen edı. Amerikada oqudy josparlaǧan şeteldıkter F nemese M sanatyndaǧy viza aluy tiıs. Mūndai vizalardy tek şeteldık studentter men almasu baǧdarlamalary qatysuşylaryn qabyldauǧa sertifikattalǧan oqu oryndary (SEVP) ǧana räsımdei alady.
Būl endı Garvard universitetı şeteldık studentterdı qabyldai almaidy degendı bıldıredı. Qazırgı uaqytta Garvardta oqyp jürgen şeteldık studentter basqa universitetke auysuǧa mäjbür bolady, äitpese elde qalu qūqyǧynan aiyrylady.
«Äkımşılık Garvardty zorlyq-zombylyqty örşıtuge, antisemitizmge jäne Qytaidyŋ Kommunistık partiiasymen bailanys ornatuǧa jauapty dep sanaidy», — dedı Kristi Noem.
Ol sondai-aq universitetter üşın «şeteldık studentterdı qabyldau — qūqyq emes, artyqşylyq» jäne «olar oqu aqysynyŋ joǧary boluynan paida körıp otyr» dep atap öttı.
Būl özgerıs Qazaqstannyŋ jetı azamatyna qalai äser etetını belgısız. Olar basqa oqu ornyna auysuy da mümkın. SIM äzırge eşnärse aitpady.
2024-2025 jyly Garvard universitetı 6800 şetel studentın qabyldaǧan. Būl osyndaǧy jalpy studentterdıŋ 27,2 paiyzyn qūraidy.
