ء“وز-ءوزىن جارنامالاۋ”. قىزىلوردانىڭ ەكس-اكىمى سىنعا ۇشىرادى

قىزىلوردالىق ارداگەرلەر قىرىمبەك كوشەرباەۆتى ءوز-ءوزىن جارنامالادى دەپ ايىپتادى، دەپ حابارلايدى “ادىرنا” ۇلتتىق پورتالى Ulysmedia.kz-كە سىلتەپ “ارداگەرلەر داۋىسى” قوعامدىق بىرلەستىگى قىزىلوردا وبلىسىنىڭ پروكۋرورى ريزابەك وجاروۆ پەن قازىرگى وبلىس اكىمى نۇرلىبەك نالىباەۆقا رەسمي حات جولداپ، السەيت جانە سىرداريا كوپىرلەرىنە ورناتىلعان ءمارمار تاقتالاردىڭ زاڭدىلىعىن تەكسەرۋدى سۇرادى. بۇل تاقتالاردا اتالمىش نىسانداردىڭ “قىرىمبەك كوشەرباەۆتىڭ باسشىلىعىمەن سالىنعانى” جازىلعان. ارداگەرلەر بۇل ارەكەتتى مەملەكەتتىك قىزمەتكەردىڭ ەتيكاسىنا قايشى دەپ باعالاپ، ونى اشىق تۇردە ءوز-ءوزىن جارنامالاۋ دەپ اتادى. ولار سونداي-اق ميللياردتاعان تەڭگەگە سالىنعان، بىراق اياقتالماي قالعان ۇزاق مەرزىمدى قۇرىلىس نىساندارىنا دا وسىنداي تاقتايشالاردى قويۋدى ۇسىندى. ۆەتەرانداردىڭ مالىمدەمەسىنەن: “مەملەكەتتىك عيماراتتارعا ەسكەرتكىش تاقتا ورناتۋعا قاتىستى اۋدان نەمەسە وبلىس دەڭگەيىندە ارنايى شەشىم بار ما؟ بۇرىن-سوڭدى مۇنداي جاعدايدى كورمەگەن ەدىك. مەملەكەتتىك قارجىعا سالىنعان نىساندارعا اكىمدەردىڭ ءوز ەسىمىن جازۋى زاڭعا قايشى ەمەس پە؟ ەگەر ولار جەكە قاراجاتتارىنا سالسا، تۇسىنەمىز. ال بۇل – اكىمنىڭ تىكەلەي مىندەتى. مۇنداي ارەكەت مەملەكەتتىك قىزمەتكەردىڭ ەتيكالىق دەڭگەيىنە كولەڭكە تۇسىرەدى جانە بۇل ءسوزسىز ءوزىن-ءوزى جارنامالاۋ رەتىندە قابىلدانادى”، – دەلىنگەن حاتتا. ەسكە سالا كەتەيىك، قىرىمبەك كوشەرباەۆ قىزىلوردا وبلىسىن 2013 جىلدان 2019 جىلعا دەيىن باسقارعان.