بۇگىن اقوردادا مەملەكەت باسشىسى قاسىم-جومارت توقاەۆ گەرمانيا فەدەراتيۆتىك رەسپۋبليكاسى بۋندەسراتىنىڭ پرەزيدەنتى، ساار فەدەرالدى جەرىنىڭ پرەمەر-ءمينيسترى انكە رەلينگەرمەن كەزدەسۋ وتكىزدى. كەزدەسۋ بارىسىندا قاسىم-جومارت توقاەۆ پرەزيدەنتتىك باسقارۋ جۇيەسى ساقتالاتىنىن ايتتى، دەپ حابارلايدى "ادىرنا" ۇلتتىق پورتالى.
كەزدەسۋ بارىسىندا پرەزيدەنت گەرمانيانى قازاقستاننىڭ ەۋروپاداعى نەگىزگى ستراتەگيالىق سەرىكتەسى دەپ اتاپ ءوتتى. توقاەۆ بۇل ەلدى ەلىمىزدىڭ ەكونوميكاسىنا جەتەكشى ينۆەستيتسيا قۇيىپ وتىرعان مەملەكەتتەردىڭ ءبىرى رەتىندە باعالادى.
"گەرمانيا – ءبىز ءۇشىن ماڭىزدى ەل. سىزدەردىڭ مەملەكەتپەن ىنتىماقتاستىققا ايرىقشا ءمان بەرەمىز. جۋىرداعى گەرمانياعا ساپارىمدا پرەزيدەنت شتاينمايەر مىرزامەن كەلىسسوزدەر جۇرگىزدىم. پارلامەنتارالىق بايلانىستى دا نىعايتۋعا مۇددەلىمىز", - دەدى قاسىم-جومارت توقاەۆ.
سونداي-اق مەملەكەت باسشىسى ەلىمىزدىڭ ەكونوميكالىق ساياساتىنىڭ باسىم باعىتتارىنا توقتالدى. ونىڭ ايتۋىنشا، قازاقستان ءىرى ينفراقۇرىلىمدىق جوبالاردى جۇزەگە اسىرۋعا، تسيفرلاندىرۋ مەن جاساندى ينتەللەكتتى دامىتۋعا، كولىك-لوگيستيكا مەن اۋىل شارۋاشىلىعىن وركەندەتۋگە كۇش سالىپ وتىر.
پرەزيدەنت سوڭعى جىلدارى ەلدە اۋقىمدى ساياسي رەفورمالار جۇرگىزىلگەنىن ايتىپ ءوتتى. ول كونستيتۋتسيا مەن زاڭناماعا ەنگىزىلگەن وزگەرىستەر قازاقستاننىڭ جاڭعىرۋ جولىنداعى قادامدارىن ناقتىلاي تۇسەتىنىن جەتكىزدى. سونىمەن قاتار، قۇقىق قورعاۋ جانە سوت جۇيەسىنە دە وزگەرىستەر ەنگىزىلۋى مۇمكىن ەكەنىن اتاپ ءوتتى. دەگەنمەن پرەزيدەنتتىك باسقارۋ جۇيەسى ساقتالادى دەپ مالىمدەدى.
انكە رەلينگەر كەزدەسۋگە مۇمكىندىك بەرگەنى ءۇشىن العىس ايتىپ، قازاقستاندى گەرمانيا ءۇشىن ماڭىزدى سەرىكتەس دەپ باعالادى.
"فەدەرالدىق پرەزيدەنت شتاينمايەر – قازاقستان مەن ورتالىق ازيانىڭ شىنايى دوسى. ەكى ەلدىڭ يگىلىگى ءۇشىن ورتاق ماقساتتاردى ىلگەرىلەتۋگە دايىنبىز", - دەدى گەرمانيا بۋندەسراتىنىڭ پرەزيدەنتى.
كەزدەسۋدە قازاقستان مەن گەرمانيا اراسىنداعى ساۋدا-ەكونوميكالىق، ينۆەستيتسيالىق جانە مادەني-گۋمانيتارلىق ىنتىماقتاستىقتى دامىتۋ ماسەلەلەرى تالقىلاندى.
