ءبىز زۇلمات جىلداردىڭ قۇرباندارىن ەشقاشان ۇمىتپايمىز – پرەزيدەنت

31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي مەملەكەت باسشىسى ۇندەۋ جاسادى، دەپ حابارلايدى "ادىرنا" ۇلتتىق پورتالى. مەملەكەت باسشىسى قاسىم-جومارت توقاەۆ 31 مامىر – ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي مالىمدەمە جاساپ، تاريحي ادىلەتسىزدىكتەن زارداپ شەككەندەردىڭ رۋحىنا تاعزىم ەتتى. ء"بىز جىل سايىن 31 مامىردا ساياسي قۋعىن-سۇرگىن جانە اشارشىلىق قۇرباندارىن ەسكە الامىز. زۇلمات زاماندا قازا بولعان جانداردىڭ رۋحىنا تاعزىم ەتەمىز", – دەدى پرەزيدەنت. ول وتكەن عاسىردىڭ ەڭ قايعىلى كەزەڭدەرىنىڭ ءبىرى – كۇشتەپ ۇجىمداستىرۋ ناۋقانى مەن اشارشىلىق جىلدارى تۋرالى ايتا كەلە، قازاق حالقىنىڭ سول ۋاقىتتا اۋىر قاسىرەتكە دۋشار بولعانىن ەسكە سالدى. «جۇرتىمىز الاپات اشتىقتان قىناداي قىرىلدى، كوپ ادام جان ساۋعالاپ، شەتەل اسىپ كەتۋگە ءماجبۇر بولدى. ستاليندىك رەپرەسسيا كەزىندە ۇلتىمىزدىڭ زيالىلارى، كوزى اشىق ازاماتتار جاپپاي قۋدالاندى. مىڭداعان ادام حالىق جاۋى اتانىپ، سوتسىز اتىلدى»، – دەدى مەملەكەت باسشىسى. پرەزيدەنت بۇل زۇلمات جىلدارى ۇلت كوشباسشىلارى مەن مادەنيەت، ءبىلىم سالاسىنىڭ ءىرى وكىلدەرى – ءاليحان بوكەيحانوۆ، احمەت بايتۇرسىنۇلى، ساكەن سەيفۋللين، ءىلياس جانسۇگىروۆ سەكىلدى ۇلتىمىزدىڭ ارداقتى تۇلعالارىنان ايىرىلعانىمىزدى اتاپ ءوتتى.