قۇلسارى قالاسىنداعى جانارماي قۇيۋ بەكەتىندە 30 مامىردا ورىن العان جويقىن جارىلىستان زارداپ شەككەندەردىڭ سانى 16 ادامعا جەتتى، دەپ حابارلايدى "ادىرنا" ۇلتتىق پورتالى.
بۇل تۋرالى اتىراۋ وبلىسى اكىمدىگىنىڭ ءباسپاسوز قىزمەتى مالىمدەدى.
العاشقىدا جارالانعاندار سانى 14 ادام دەپ حابارلانعان ەدى، الايدا كەيىن بۇل كورسەتكىش ارتتى.
اتىراۋ وبلىستىق توتەنشە جاعدايلار دەپارتامەنتىنىڭ مالىمەتىنشە، جارىلىس گاز تاسىمالداۋشى كولىكتەن جانارماي بەكەتىنىڭ رەزەرۆۋارىنا گاز قۇيىلىپ جاتقان ساتتە ورىن العان. كەنەتتەن تۇتانعان جالىن جانارماي بەكەتىنىڭ اۋماعىنداعى ەكى عيماراتقا تارالىپ، جالپى 450 شارشى مەتر اۋماقتى ءورت شارپىعان.
"قازىر ءورتتىڭ ناقتى سەبەپتەرىن انىقتاۋ ءۇشىن وبلىستىق جانە اۋداندىق توتەنشە جاعدايلار بولىمىنەن 6 مامان وقيعا ورنىندا جۇمىس جۇرگىزىپ جاتىر", – دەدى وبلىستىق تجد باستىعىنىڭ ورىنباسارى ناريمان وتەشوۆ.
جارىلىستان جارالانعاندار اراسىندا 25 پەن 75 جاس ارالىعىنداعى ازاماتتار بار. ولاردىڭ دەنەلەرىنىڭ 5%-دان 22%-عا دەيىنگى بولىگىن كۇيىك شالعان. جىلىوي اۋداندىق اۋرۋحاناسىنىڭ ديرەكتورى اسۇلان ابدراحمانوۆتىڭ ايتۋىنشا، 5 ادام اۋداندىق اۋرۋحانادا ەم قابىلداپ جاتىر، 6 ادام امبۋلاتوريالىق ەمدەلۋگە ۇيىنە جىبەرىلگەن، 3 ناۋقاس وبلىستىق اۋرۋحاناعا اۋىستىرىلعان.
"بارلىق پاتسيەنتتەردىڭ جاعدايى تۇراقتى، ومىرلەرىنە قاۋىپ جوق", – دەدى دارىگەر.
قازىرگى ۋاقىتتا وقيعانىڭ ءمان-جايى انىقتالىپ جاتىر. ءتيىستى ورگاندار تاراپىنان تەرگەۋ جۇمىستارى باستالدى.
ۇقساس جاڭالىقتار
