«ءبارى اللانىڭ قالاۋىمەن...» شەرزات ءىسى بويىنشا سوتتالۋشى كەشىرىم سۇرادى

شەرزات پولاتتىڭ ءولىمى بويىنشا ەڭ اۋىر جازا ارقالايىن دەپ وتىرعان ابزال شىناسىل سوتتا وكىنىش ءبىلدىرىپ، كەشىرىم سۇرادى، دەپ حابارلايدى “ادىرنا”. «جابىرلەنۋشى قارجاۋباي نۇرىموۆتىڭ وتباسىنان كەشىرىم سۇرايمىن. قايعىلارىڭىزعا ورتاقپىن. قازا قايىرلى بولسىن. بارلىعى - اللانىڭ جازۋى، بۇيرىق شىعار. مەن شەرزات پولاتقا قول كوتەرگەن جوقپىن، ونى ولتىرگەن دە ەمەسپىن. ەگەر سونداي ارەكەتكە بارعان بولسام، باسىندا-اق مويىندايتىن ەدىم. مەن ىستەگەن ىسىمنەن قاشاتىن ادام ەمەسپىن. ال ءوز جاۋابىمدى نە ءۇشىن وزگەرتكەنىمدى تەرگەۋ بارىسىندا ءتۇسىندىردىم»، - دەدى ول. ول وزىنە قر قك-ءنىڭ «دەنساۋلىققا قاساقانا اۋىر زيان كەلتىرۋ» بابى بويىنشا جازا تاعايىنداۋدى سۇرادى. «ءبىر ۇلكەن قاتەلىگىم - نامىسقا بەرىلىپ، قىلمىستى موينىما العانىم. بىراق مەن جازادان قورىقپايمىن. سوتتان تەك ءادىل جازا تاعايىنداۋدى سۇرايمىن. قر قىلمىستىق كودەكسىنىڭ 106-بابى بويىنشا شەشىم شىعارۋىڭىزدى وتىنەمىن»، - دەدى ول. سوتتالۋشى ءوزىنىڭ وتباسى تۋرالى شىندىققا جاناسپايتىن اقپارات تاراعانىن ايتتى. «مەن بارشا قازاق حالقىنان كەشىرىم سۇرايمىن. سوڭعى كەزدە اقپارات قۇرالدارى مەن الەۋمەتتىك جەلىلەردە ماعان قاتىستى ءتۇرلى دەرەكتەر ايتىلىپ جاتىر: «بايدىڭ بالاسى»، «دەپۋتاتتىڭ، اكىمنىڭ بالاسى» دەپ. بىراق مەنىڭ ەشقانداي «اكە-كوكەم» جوق. جالعىز انام بار، سونىمەن بىرگە تۇرامىن. ءبىز قىلمىستىق توپ ەمەسپىز. سول جەرگە قانداي دا ءبىر ماقساتپەن نەمەسە دايىندىقپەن بارعان جوقپىز. شەرزات پولاتتى مەن ولتىرگەن جوقپىن. بىراق، وكىنىشكە قاراي، ونى ناقتى كىمنىڭ ولتىرگەنى تۋرالى دالەل مەندە جوق، سوندىقتان ايتا المايمىن»، - دەدى ول. ايتا كەتەيىك، مەملەكەتتىك ايىپتاۋشى ابزال شىناسىلدى «ادام ءولتىرۋ» جانە «بۇزاقىلىق» باپتارى بويىنشا كىنالى دەپ تانىپ، 23 جىلعا باس بوستاندىعىنان ايىرۋدى سۇراعان ەدى.