پروكۋراتۋرا اتباسار كولونياسىندا ازاپتاۋ تۋرالى رەزونانس تۋدىرعان ءىس بويىنشا اپەللياتسيالىق ءوتىنىش جاسادى. بۇل تۋرالى باس پروكۋراتۋرانىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
قىلمىستىق ءىس اقمولا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى القابيلەردىڭ قاتىسۋىمەن قارالدى.
مالىمەت بويىنشا، اقمولا وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا القابيلەردىڭ ۇكىمى نەگىزىندە اقمولا وبلىستىق قىلمىستىق-اتقارۋ جۇيەسى دەپارتامەنتىنىڭ «№1 مەكەمە» رمم-ءنىڭ بۇرىنعى 12 قىزمەتكەرى اقتالدى.
اتباسار قالاسىنداعى №1 تۇزەۋ مەكەمەسىندە بۇرىنعى لاۋازىمدى تۇلعالارى سوتتالعاندارعا ازاپتاۋ ارەكەتىن قولدانعانى ءۇشىن ايىپتالعان.
القابيلەردىڭ ۇكىمىنە سايكەس، ايىپتالۋشىلار كىناسىز دەپ تانىلىپ، قازاقستان رەسپۋبليكاسى قىلمىستىق كودەكسىنىڭ 146-بابى، 3-بولىگىنىڭ 1-تارماعىندا كوزدەلگەن قىلمىستى جاساۋداعى ايىپ بويىنشا اقتالدى.
اقمولا وبلىسىنىڭ پروكۋراتۋراسى سوت اكتىسىمەن كەلىسپەي، 2025 جىلى 14 اقپاندا اپەللياتسيالىق ءوتىنىشحات ەنگىزدى.
ەسكە سالا كەتەيىك، 2023 جىلدىڭ كۇزىندە قازاقستانداعى كولونيادا تيمۋر دانەباەۆتىڭ قاتىگەز ازاپتالۋىنىڭ ۆيدەولارى الەۋمەتتىك جەلىلەردە تارادى. بۇل جاعداي قوعامدىق رەزونانس تۋدىردى. سودان كەيىن قىزمەتتىك تەكسەرۋ باستالدى. 6 قىركۇيەكتە قۇقىق قورعاۋشى ەلەنا سەمەنوۆا ازاپتاۋلار فاكتىسى بويىنشا قىلمىستىق ءىس قوزعالعانىن حابارلادى.
القا بيلەر سوتى اتباسار كولونياسىنداعى ازاپتاۋ ىسىندە سوتتالۋشىلاردى اقتاعاننان كەيىن قازاقستاننىڭ ۇكىمەتتىك ەمەس ۇيىمدارىنىڭ (ۇەۇ) ازاپتاۋعا قارسى كواليتسياسى باس پروكۋرور بەرىك اسىلوۆقا جۇگىنگەن بولاتىن. ولار بەلسەندىنى ازاپتاۋ تۋرالى وقيعا ۆيدەودان كەيىن عانا بەلگىلى بولعانىن، ول بەينەدە كولونيا قىزمەتكەرلەرىنىڭ تۇتقىندى ازاپتاعانى انىق كورىنەتىنىن اتاپ وتكەن.
اتباسار تۇرمەسىندە تيمۋر دانەباەۆتى ازاپتاعاندار اقتالىپ كەتكەن. ءىس القابيلەردىڭ قاتىسۋىمەن قارالعان. قىلمىتسىق اتقارۋ جۇيەسىنىڭ بۇرىنعى 12 قىزمەتكەرىنىڭ ءبارى اقتالىپ شىقتى. قاماۋعا الىنعان ءۇش ادام بوساتىلدى. قازىر بارلىق اقتالعاندار "زاڭسىز قىلمىستىق قۋدالاۋ" ءۇشىن وتەماقى تالاپ ەتۋگە قۇقىلى.
