قازاقستان رەسپۋبليكاسى كونستيتۋتسياسىنىڭ 30 جىلدىعىنا بايلانىستى پارلامەنت ءماجىلىسىنىڭ قاراۋىنا راقىمشىلىق جاساۋ تۋرالى زاڭ جوباسى كەلىپ ءتۇستى، دەپ حابارلايدى "ادىرنا" ۇلتتىق پورتالى.
بۇل باستاما دەپۋتاتتاردىڭ ۇسىنىسىمەن، گۋمانيزم قاعيداسى نەگىزىندە جانە قىلمىستىق ساياساتتى ىزگىلەندىرۋ ماقساتىندا ازىرلەنگەن.
زاڭ جوباسى بويىنشا، مەملەكەت پەن قوعام قاۋىپسىزدىگىنە ەلەۋلى قاتەر توندىرمەيتىن قىلمىستار جاساعان ازاماتتارعا راقىمشىلىق جاسالادى. ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ توراعاسى سنەجاننا يماشەۆانىڭ ايتۋىنشا، قۇجاتتا الەۋمەتتىك وسال توپ وكىلدەرىن، سونىڭ ىشىندە كامەلەتكە تولماعانداردى، جۇكتى ايەلدەردى، بالاسى بار انالاردى، زەينەتكەرلەر مەن مۇگەدەكتەردى بوساتۋ ۇسىنىلعان.
ءماجىلىس دەپۋتاتى ءۇنزيلا شاپاقتىڭ ايتۋىنشا، جالپى 4,1 مىڭ ادام تولىق بوساتىلادى. ونىڭ ىشىندە 632 ادام – قىلمىستىق اتقارۋ جۇيەسى مەكەمەلەرىنەن، 3,5 مىڭ ادام – پروباتسيا قىزمەتىنىڭ تىزىمىنەن بوساتىلادى. بۇدان بولەك، جازانىڭ وتەلمەگەن مەرزىمىن قىسقارتۋ 11 مىڭ ادامعا قولدانىلادى. ولاردىڭ قاتارىندا باس بوستاندىعىنان ايىرۋ ورىندارىندا وتىرعان 5,4 مىڭ ادام مەن پروباتسيا قىزمەتىنىڭ ەسەبىندە تۇرعان 5,5 مىڭ ادام بار.
دەپۋتاتتىڭ سوزىنشە، 833 ايەلگە قاتىستى راقىمشىلىق جاسالادى. سونىڭ ىشىندە 109 ايەل تولىق بوساتىلىپ، 724 ايەلدىڭ جازانى وتەۋ مەرزىمى قىسقارتىلادى.
