قازاقستان مەن رەسەي اراسىنداعى ۆيزاسىز رەجيم ساقتالادى. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى «ادىرنا» ءتىلشىسى.
ول الەۋمەتتىك جەلىدە ەكى ەل اراسىندا ۆيزا رەجيمى ەنگىزىلدى دەگەن جالعان اقپارات تاراعانىن مالىمدەدى.
«كەيبىر بۇقارالىق اقپارات قۇرالدارى رەسەيدى ۆيزالىق رەجيمدى ەنگىزەتىندەي كورسەتتى. قازاقستان مەن رەسەي اراسىندا ۆيزاسىز رەجيم بار جانە ول ساقتالادى. بۇل اشەيىن شەكارادان وتۋگە قاتىستى تالاپتار. ەۋروپاداعى شەكارانى، قازاقستانداعى شەكارانى وتكەندە تۋرا سولاي ءاربىر كەلۋشىنىڭ بيومەترياسىن الادى. بۇل – قالىپتى جاعداي. سوندىقتان، ارىپتەستەر، حالىقتى جالعان، دۇرىس ەمەس تاقىرىپتارمەن دۇرلىكتىرمەڭىزدەر»،—دەدى ءسىم رەسمي وكىلى.
ايتا كەتەيىك، 30 ماۋسىمنان باستاپ رەسەي شەتەلدىكتەر ءۇشىن ەلگە كىرۋدىڭ جاڭا ەرەجەلەرىن ەنگىزەدى. شەكارادان ءوتۋ ءۇشىن ارنايى QR-كود قاجەت بولادى، ونى وتكىزۋ بەكەتىندە كورسەتۋ كەرەك.
