ۇلتتىق بانكتىڭ انتيفرود ورتالىعى ءوز ناتيجەسىن بەرىپ جاتىر. ايتا كەتۋ كەرەك، بۇل ورتالىق وتكەن جىلى بانكتەر، قۇقىق قورعاۋ ورگاندارى مەن بايلانىس وپەراتورلارىنىڭ باسىن بىرىكتىرىپ قۇرىلعان بولاتىن.
ورتالىق وسى ۋاقىت ىشىندە 2,5 ملرد تەڭگەدەن استام سوما كولەمىندەگى زالالدىڭ الدىن الىپ، 60 مىڭنان استام ينتسيدەنت تىركەدى. ەڭ ءجيى كەزدەسەتىن جاعدايلار – تەلەفون ارقىلى الاياقتىق جاساۋ (22%), جالعان ينۆەستيتسيالىق ۇسىنىستار جانە «دروپپەرلىك» كارتالار ارقىلى جاسالاتىن وپەراتسيالار (19%).
«ۇلتتىق بانكتىڭ انتيفرود-ورتالىعى جاساندى ينتەللەكت تەحنولوگيالارىن قولدانۋ ارقىلى الاياقتىق سحەمالاردى بولجاۋ مۇمكىندىگىن دامىتۋدى جالعاستىرادى جانە باس پروكۋراتۋرا مەن بايلانىس وپەراتورلارىنىڭ دەرەكتەر بازالارىمەن ينتەگراتسيالانادى»، - دەدى ۇلتتىق بانك توراعاسىنىڭ كەڭەسشىسى – تسيفرلىق ترانسفورماتسيا جونىندەگى جەتەكشى بينۇر جالەنوۆ.
باس بانك پەن ەلىمىزدىڭ قارجى نارىعىن رەتتەۋ جانە دامىتۋ اگەنتتىگى جانە قۇقىق قورعاۋ ورگاندارىمەن بىرلەسىپ، ءبىر جىل ىشىندە دەرەكتەر الماسۋ پلاتفورماسى قۇرىلدى. بۇل جۇيەگە بانكتەر، تولەم جانە ميكروقارجى ۇيىمدارى، ۇيالى بايلانىس وپەراتورلارى، ۋاكىلەتتى قۇقىق قورعاۋ جانە وزگە دە مەملەكەتتىك ورگاندار قوسىلدى.
سونىمەن قاتار، الاياقتىقپەن كۇرەسكە ارنالعان ورتالىقتاندىرىلعان جۇيەنى قامتاماسىز ەتەتىن زاڭنامالىق بازا ازىرلەندى. بۇگىنگى تاڭدا انتيفرود-ورتالىققا 200-دەن استام ۇيىم قوسىلعان.
«انتيفرود-ورتالىعى – بەلسەندى دامىپ جاتقان ەكوجۇيە. ءبىز ورتالىقتى دامىتۋدى ءارى قاراي جالعاستىرۋعا، سونىڭ ىشىندە زاڭنامانى جەتىلدىرۋگە دە قولداۋ كورسەتۋگە دايىنبىز»، – دەپ اتاپ ءوتتى ۇلتتىق بانكتىڭ تولەم جۇيەلەرى دەپارتامەنتىنىڭ ديرەكتورى ەرلان اشىقبەكوۆ.
