قازاقستاننىڭ ۋكرايناداعى توتەنشە جانە وكىلەتتى ەلشىسى ۋكراينا پرەزيدەنتى ۆلاديمير زەلەنسكيگە سەنىم گراموتالارىن تاپسىردى، دەپ حابارلايدى “ادىرنا” ۇلتتىق پورتالى ءسىم-نە سىلتەپ.
سىرتقى ىستەر مينيسترلىگىنىڭ مالىمەتىنشە، سالتاناتتى ءراسىم يۋنەسكو-نىڭ دۇنيەجۇزىلىك مۇرالار تىزىمىنە ەنگەن كيەۆتەگى «سوفيا» ۇلتتىق قورىق-مۇراجايى اۋماعىندا ءوتتى.
سەنىم گراموتالارىن تاپسىرۋ ءراسىمى اياسىندا وتكەن قىسقاشا اڭگىمە بارىسىندا تاراپتار قازاق-ۋكراين دوستىعىن، ەكى ەل اراسىنداعى ىنتىماقتاستىقتىڭ قازىرگى جاي-كۇيى مەن دامۋ بولاشاعىن، سونداي-اق ءتۇرلى سالاداعى ىسكەرلىك بايلانىستاردى تالقىلادى.
پرەزيدەنتتىڭ جارلىعىمەن تولەجان بارلىباەۆ 2024 جىلدىڭ شىلدەسىندە قازاقستاننىڭ ۋكرايناداعى ەلشىسى قىزمەتىنە تاعايىندالعان بولاتىن.
1970 جىلى تەمىرتاۋدا دۇنيەگە كەلگەن ديپلومات ماسكەۋدەگى رەسەي مەملەكەتتىك گۋمانيتارلىق ۋنيۆەرسيتەتىن تامامداعان. بۇعان دەيىن قازاقستاننىڭ ۋكراينا جانە پولشاداعى ەلشىلىكتەرىندە ءتۇرلى قىزمەتتەر اتقارىپ، سلوۆاكياداعى ەلشى، سونداي-اق حورۆاتيا، بوسنيا جانە گەرتسەگوۆينا مەن چەرنوگوريادا قوسالقى نەگىزدە ەلشى بولعان.
سونىمەن قاتار، ول قازاقستان رەسپۋبليكاسى پرەزيدەنتى اكىمشىلىگىندە دە جۇمىس ىستەگەن.
ۇقساس جاڭالىقتار
