قازاقستاننىڭ تۇڭعىش پرەزيدەنتى نۇرسۇلتان نازارباەۆ 2019 جىلدى جاستار جىلى دەپ جاريالاعانى بەلگىلى. ەلباسىنىڭ جاستارعا كوڭىل ءبولىپ، بيىلعى جىلدى جاستار جىلى دەپ جاريالاۋى تەگىن ەمەس. ويتكەنى مەملەكەت تاراپىنان جاستارعا زور قولداۋ قاجەت.
جامبىل وبلىسى اكىمدىگى جاستار جىلىنا وراي جاستاردىڭ كاسىپكەرلىكپەن اينالىسۋىنا ايرىقشا نازار اۋدارىپ وتىر. ونىڭ جارقىن ءبىر دالەلىنىڭ ءبىرى – شۋ اۋدانىنىڭ تۇرعىنى ناۋرىزبەك احمەتوۆتىڭ «بيزنەستىڭ جول كارتاسى – 2020» باعدارلاماسى ارقىلى ءوز كاسىبىن باستاپ وتىرۋى بولسا كەرەك. جاستار جىلىنا وراي ول ارنايى جوبا ۇسىنىپ، 2 ملن. 500 مىڭ تەڭگە ۇتىپ العان. اتالعان قارجىعا ول اۋدانى 250 شارشى مەتر بولاتىن جىلىجاي سالىپ، ءبىر ازاماتتى جۇمىسپەن قامتىپ وتىر.
«جىلىجايدا كوك پياز، سالات جاپىراقتارى مەن ۋكروپ ونىمدەرىن ءوسىرىپ وتىرمىن. اتالعان كوكونىستەردى جاڭا جىلعا دەيىن كۇتىپ باپتاپ، حالىققا ساتامىن. وسى ونىمدەردى ءوسىرىپ بولعان سوڭ جىلىجايىمدا قيار ءوسىرۋدى جوسپارلاپ وتىرمىن. سەبەبى وزدەرىڭىزگە بەلگىلى قيارعا دەگەن سۇرانىس وتە جوعارى. ونىڭ ۇستىنە قياردى ەرتە كوكتەمدە شىعاراتىن بولسام، ونىڭ باعاسى دا جاقسى بولادى. وسى ءىسىمدى باستاۋعا كومەكتەسكەن جەرگىلىكتى باسشىلارعا العىسىمدى جەتكىزگىم كەلەدى. سەبەبى ولار مەنىڭ كوپتەن بەرى ارمانداپ جۇرگەن ءىسىمدى باستاۋعا كومەكتەستى. ال قۇربى-قۇرداستارىما ايتارىم، ءبىر ءىستى باستايمىن دەپ تالپىنساڭ، مەملەكەت تاراپىنان قولداۋ الۋعا بولادى. سوندىقتان دا جاستار مەن سياقتى ەلىمىزدەگى باعدارلامالاردى زەرتتەپ، كوپ ويلانباي ءوز ءىسىن باستاپ كەتۋى كەرەك»، – دەيدى ول
قازىرگى تاڭدا ناۋرىزبەك احمەتوۆ ءبىر ادامدى جۇمىسپەن قامتىپ وتىر. ەگەر ول «بيزنەستىڭ جول كارتاسى – 2020» باعدارلاماسى ارقىلى العان قارجىسىن ءتيىمدى يگەرسە، بولاشاقتا ونداعان ادامدى جۇمىسپەن قامتيتىنداي ۇلكەن جىلىجاي سالعىسى كەلەدى. سونداي-اق ول بەلگىلىر مەكەمەدە بولار بولماس جالاقىعا كۇن كورگەنشە، ءوز بەتىڭشە ارەكەت ەتكەن ءجون ەكەنىن ايتادى.
ناۋرىزبەك احمەتوۆ ويىن بولتىرىك شەشەن اۋىلىنىڭ تۇرعىنى دياس قانافيندە قولدايدى. بيىل جاستار جىلى جاريالانعان گرانتقا قاتىسىپ، 1 ملن. 200 مىڭ تەڭگە ۇتىپ العان. اتالعان قارجىعا جىلىجاي سالىپ، ساڭىراۋقۇلاق ءوسىرۋدى كوزدەپ وتىر. 120 شارشى مەتر بولاتىن جىلىجايدى مامىر ايىندا ىسكە قوساتىنىن ايتادى.
«ادىرنا»
ۇلتتىق پورتالى
