قازاق ەلى تاۋەلسىزدىكتىڭ ارقاسىندا تولايىم تابىستارعا قول جەتكىزدى. ازاتتىقتىڭ ارقاسىندا مەملەكەت قۇرۋشى قازاق ۇلتىنىڭ ۇلەس سالماعى ارتىپ، مەملەكەتتىك ءتىلدىڭ مەرەيى ۇستەم بولدى. بۇدان بولەك حالىقتىڭ سانى كوبەيگەن سايىن الەۋمەتتىك نىساندارعا سۇرانىس ارتتى.
ماسەلەن جامبىل وبلىسىندا تاۋەلسىزدىكتىڭ 28 جىلىندا 870-تەن استام الەۋمەتتىك نىسان بوي كوتەرگەن ەكەن. وبلىستا تاۋەلسىزدىك جىلدارى الەۋمەتتىك سالا ايتارلىقتاي كورسەتكىشكە قول جەتكىزدى دەسەك، وسى ۋاقىت ارالىعىندا وڭىرە 871 الەۋمەتتىك نىسان سالىنعان. اتاپ ايتار بولساق، 28 جىلدا بارلىعى 245 ءبىلىم، 126 دەنساۋلىق ساقتاۋ، 500-گە تارتا سپورت نىساندارى جاڭادان بوي كوتەرىپ، ەسىگىن ايقارا اشقان.
«تاۋەلسىزدىك العان جىلداردان باستاپ، وڭىردە 126 مەديتسينالىق نىسان سالىندى. قازىر جالپى سانى 391 دەنساۋلىق ساقتاۋ ۇيىمى تۇراقتى قىزمەت كورسەتەدى. تيىسىنشە سالانى قارجىلاندىرۋ دا ونداعان ەسەگە ارتقان. ماسەلەن، 2000 جىلى سالاعا بولىنگەن قارجى 2 ميلليارد تەڭگە بولسا، اعىمداعى جىلى ول كورسەتكىش 61,4 ميللياردقا جەتىپ وتىر»، – دەيدى وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ.
ايماقتا «جاسىل ەكونوميكا» باعىتىنداعى جۇمىستار دا كوش ىلگەرى. بۇل سالا اسىرەسە، 2010 جىلدان بەرى قارقىن الۋدا. قازىر كۇن، سۋ جانە جەلدەن قۋات وندىرەتىن 11 ەلەكتر ستانساسى جۇمىس ىستەپ تۇر. ولاردىڭ جالپى قۋاتىلىعى 169 مەگاۆاتت. ايتا كەتۋ كەرەك، قازىر جەرگىلىكتى تۇرعىندار بالامالى ەنەرگيا كوزدەرىنەن وندىرىلەتىن ەنەرگيانىڭ 20 پروتسەنتىن تۇتىنىپ وتىر.
«بۇگىندە وڭىردە تاعى بەس جوبانىڭ قۇرىلىسى جۇرگىزىلۋدە. ولاردىڭ جالپى قۇنى 118,5 ميلليارد تەڭگە، قۋاتتىلىعى 233 مەگاۆاتتى قۇرايتىن بولادى. ەكى جوبانى بيىل جىل سوڭىنا دەيىن ىسكە قوسۋدى جوسپارلاپ وتىرمىز»، – دەيدى وبلىستىق ەنەرگەتيكا جانە تۇكش باسقارماسى باسشىسىنىڭ ورىنباسارى قۇدايبەرگەن قورعانباەۆ.
ايتا كەتەيىك، تاۋەلسىزدىك جىلدارى ايماقتا اتقارىلعان جۇمىستاردى اۋىز تولتىرىپ ايتۋعا بولادى. ايتالىق، وبلىس بيۋدجەتى سوڭعى 15 جىلدا 12 ەسەگە ارتقان. بيىلدىڭ وزىندە ءوڭىردىڭ ەكونوميكالىق كورسەتكىشى 5 پروتسەنتكە وسكەن. ءوندىرىس كولەمى 6,5, جەكە ينۆەستيتسيا 20 پروتسەنتكە جەتتى. بيىل جىل باسىنان بەرى 430 مىڭ شارشى مەتر تۇرعىن ءۇي پايدالانۋعا بەرىلدى. ءبىر سوزبەن ايتقاندا، جامبىل وبلىسى تاۋەلسىزدىك جىلدارىندا تولايىم تابىستارعا قول جەتكىزىپ، قارىشتى دامۋ جولىنا ءتۇستى.
«ادىرنا»
ۇلتتىق پورتالى
