رەسپۋبليكانىڭ ەكى وبلىسىندا اۋىل اكىمدەرى سىبايلاس جەمقورلىق قىلمىسىن جاسادى دەپ ايىپتالىپ وتىر، سوتقا دەيىنگى تەرگەۋ ءجۇرىپ جاتىر
تۇركىستان جانە الماتى وبلىستارىندا اۋىل اكىمدەرى سىبايلاس جەمقورلىق قىلمىسىن جاسادى دەگەن كۇدىككە ءىلىندى، دەپ حابارلايدى Sputnik قازاقستان جەمقورلىققا قارسى قىزمەتكە سىلتەمە جاساپ.
سىبايلاس جەمقورلىققا قارسى قىزمەت قاڭتار ايىندا ەلىمىزدىڭ بىرقاتار وڭىرىندە اۋدان جانە اۋىل اكىمدەرىنە قاتىستى سوتقا دەيىنگى تەرگەۋ باستادى.
تۇركىستان وبلىسىندا كەنتاۋ قالاسى ەسكى يقان اۋىلدىق وكرۋگىنىڭ اكىمىنە قاتىستى سوتقا دەيىنگى تەرگەۋ جۇرگىزىلىپ جاتىر. وعان جەر ۋچاسكەسىنىڭ احۋالدىق سحەماسىنا قول قويعانى ءۇشىن جەكە كاسىپكەردەن 2 ميلليون تەڭگە پارا الدى دەگەن ايىپ تاعىلدى. بۇعان دەيىن كەلىسىلگەن پارا سوماسى 4 ميلليون 150 مىڭ تەڭگە ەكەن.
اكىم كىناسىن مويىنداپ، جەدەل تەرگەۋ جۇرگىزۋدى ءوتىندى.
سونىمەن قاتار، الماتى وبلىسىندا ىلە اۋدانى بايسەركە اۋىلدىق وكرۋگىنىڭ بۇرىنعى اكىمى مەن اكىمدىكتىڭ لاۋازىمدى تۇلعالارى كۇدىككە ءىلىندى. جەمقورلىققا قارسى قىزمەت ولاردىڭ ءجاڭاداۋىر اۋىلىنداعى 10 گا جەر ۋچاسكەسىنىڭ نىسانالى ماقساتىن شارۋا قوجالىعىنان جەكە قوسالقى شارۋاشىلىققا زاڭسىز وزگەرتۋگە قاتىسى بار-جوعىن تەكسەرىپ جاتىر.
ال تالعار اۋدانى پانفيلوۆ اۋىلدىق وكرۋگىنىڭ بۇرىنعى اكىمى شيپاجاي، سۋ قورعاۋ ايماقتارى مەن يرريگاتسيالىق جەلىلەردە جەر ۋچاسكەلەرىن ءبولۋ كەزىندە قىزمەتتىك وكىلەتتىگىن تەرىس پايدالاندى دەپ ايىپتالۋدا. 24 قاڭتاردا كۇدىكتىگە قاتىستى قاماۋدا ۇستاۋ شاراسى سانكتسيالاندى.
سوتقا دەيىنگى تەرگەۋ جالعاسىپ جاتىر.
