Respýblıkanyń eki oblysynda aýyl ákimderi sybaılas jemqorlyq qylmysyn jasady dep aıyptalyp otyr, sotqa deıingi tergeý júrip jatyr
Túrkistan jáne Almaty oblystarynda aýyl ákimderi sybaılas jemqorlyq qylmysyn jasady degen kúdikke ilindi, dep habarlaıdy Sputnik Qazaqstan jemqorlyqqa qarsy qyzmetke silteme jasap.
Sybaılas jemqorlyqqa qarsy qyzmet qańtar aıynda elimizdiń birqatar óńirinde aýdan jáne aýyl ákimderine qatysty sotqa deıingi tergeý bastady.
Túrkistan oblysynda Kentaý qalasy Eski Iqan aýyldyq okrýginiń ákimine qatysty sotqa deıingi tergeý júrgizilip jatyr. Oǵan jer ýchaskesiniń ahýaldyq shemasyna qol qoıǵany úshin jeke kásipkerden 2 mıllıon teńge para aldy degen aıyp taǵyldy. Buǵan deıin kelisilgen para somasy 4 mıllıon 150 myń teńge eken.
Ákim kinásin moıyndap, jedel tergeý júrgizýdi ótindi.
Sonymen qatar, Almaty oblysynda Ile aýdany Baıserke aýyldyq okrýginiń burynǵy ákimi men ákimdiktiń laýazymdy tulǵalary kúdikke ilindi. Jemqorlyqqa qarsy qyzmet olardyń Jańadáýir aýylyndaǵy 10 ga jer ýchaskesiniń nysanaly maqsatyn sharýa qojalyǵynan jeke qosalqy sharýashylyqqa zańsyz ózgertýge qatysy bar-joǵyn tekserip jatyr.
Al Talǵar aýdany Panfılov aýyldyq okrýginiń burynǵy ákimi shıpajaı, sý qorǵaý aımaqtary men ırrıgaııalyq jelilerde jer ýchaskelerin bólý kezinde qyzmettik ókilettigin teris paıdalandy dep aıyptalýda. 24 qańtarda kúdiktige qatysty qamaýda ustaý sharasy sankııalandy.
Sotqa deıingi tergeý jalǵasyp jatyr.
