بۇگىن «Nur Otan» پارتياسى مەن قازاقستان رەسپۋبليكاسىنىڭ كاسىپوداقتار فەدەراتسياسى اراسىنداعى ءوزارا ىنتىماقتاستىق تۋرالى مەموراندۋمعا قول قويىلدى. اتالعان قۇجاتقا قول قويۋداعى باستى ماقسات – ەلىمىزدى الەۋمەتتىك-ەكونوميكالىق جاڭعىرتۋعا، قىزمەتكەرلەردىڭ الەۋمەتتىك-ەكونوميكالىق جانە ەڭبەك قۇقىقتارى مەن مۇددەلەرىن قورعاۋ جۇيەسىن دامىتۋعا باعىتتالعان بىرلەسكەن ءىس-قيمىلداردى جۇزەگە اسىرۋ. تاراپتار وسى باعىتتاعى جۇيەلى ءوزارا ءىس-قيمىل مەن سىندارلى ىنتىماقتاستىقتى قامتاماسىز ەتۋ ءۇشىن ەكىجاقتى كەلىسىمگە كەلدى.
جيىندا «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك ەكى ۇيىمنىڭ الەۋمەت قامىن جەپ، جۇرتشىلىق مۇددەسىن كوزدەۋدە ماقساتتارىنىڭ توعىساتىن تۇستارى كوپ ەكەنىن العا تارتتى.
«مەملەكەت باسشىسى قاسىم-جومارت توقاەۆ بىلتىر تۇڭعىش رەت كاسىبي مەرەكە رەتىندە ەنگىزىلگەن كاسىپوداقتار كۇنىندە «قازىرگى كاسىپوداقتاردىڭ قوزعالىستارى ەڭبەككەرلەردىڭ جۇمىس ورنىنداعى قۇقىقتارى مەن ەڭبەك قاۋىپسىزدىگىنىڭ ساقتالۋىن، لايىقتى ەڭبەكاقى مەن الەۋمەتتىك كەپىلدىكتەر الۋىن قامتاماسىز ەتەدى»، - دەپ اتاپ وتكەن بولاتىن. وسى رەتتە، «Nur Otan» پارتياسى ارقاشان قازاقستاندىقتاردىڭ ەڭبەك قۇقىقتارىن قورعاۋعا ەرەكشە كوڭىل بولۋدە. 2019 جىلدىڭ قورىتىندىسى بويىنشا پارتياعا 217 مىڭنان اسا ارىز-شاعىم تۇسكەن، ونىڭ 3 مىڭنان استامى ەڭبەك زاڭناماسى، جالاقىنىڭ ۋاقتىلى تولەنبەۋى، زاڭسىز جۇمىستان شىعارۋ ماسەلەلەرىنە قاتىستى. ياعني، قىزمەتكەرلەردىڭ ەڭبەك قۇقىقتارى بويىنشا ماسەلەلەر ءبىزدىڭ ەل ءۇشىن وتە وزەكتى.
ەلباسى - «Nur Otan» پارتياسىنىڭ توراعاسى نۇرسۇلتان نازارباەۆ «پارتيا قاراپايىم ادامداردىڭ مۇعالىمدەردىڭ، دارىگەرلەردىڭ، ونەركاسىپتىك كاسىپورىن ەڭبەككەرلەرىنىڭ مۇددەلەرىن قورعاۋى قاجەت» دەپ اتاپ وتكەن بولاتىن. وسى باعىتتا زاڭنىڭ ۇستەمدىگىن، جۇمىسشىلاردىڭ قۇقىقتارى مەن بوستاندىقتارىن قامتاماسىز ەتۋ بويىنشا جۇمىستاردى جالعاستىرۋ ءۇشىن «Nur Otan» پارتياسى ەلىمىزدىڭ ەڭ ءىرى كاسىپوداقتار ۇيىمى - كاسىپوداقتار فەدەراتسياسىمەن ءوزارا ىنتىماقتاستىقتى ودان ءارى دامىتۋعا كەلىستى» - دەدى پارتيا توراعاسىنىڭ ءبىرىنشى ورىنباسارى.
بۇگىندە ەلىمىزدە جۇمىس ىستەيتىن ادامدار سانى 9 ميلليوننان اسسا، ولاردىڭ 2 ميلليونى قازاقستان كاسىپوداقتارى فەدەراتسياسىنىڭ قاتارىندا. ال 600 مىڭنان استامى «Nur Otan» پارتياسىنىڭ مۇشەلەرى. سوندىقتان جۇمىس ىستەيتىن ازاماتتاردىڭ وزەكتى ماسەلەلەرىن شەشۋ، ولاردىڭ قۇقىقتارى مەن مۇددەلەرىن قورعاۋ – پارتيا مەن كاسىپوداقتار قىزمەتىندەگى باسىم باعىتتاردىڭ ءبىرى.
ءوز كەزەگىندە قازاقستان كاسىپوداقتار فەدەراتسياسىنىڭ توراعاسى ەرالى توعجانوۆ ەكىجاقتى مەموراندۋمعا قول قويۋعا كەلىسىم بەرگەن پارتيا باسشىلىعىنا العىسىن ءبىلدىردى.
«Nur Otan» – ناقتى ىستەردىڭ پارتياسى. حالىقتىڭ جاناشىرى، الەۋمەتتىڭ جارشىسى بولىپ وتىرعان ەڭ ءىرى، بەدەلدى پارتيامەن وسىنداي قۇجاتقا قول قويۋعا كەلىپ وتىرمىز. وزدەرىڭىز بىلەسىزدەر، 2012 جىلدىڭ وزىندە ەلباسى نۇرسۇلتان نازارباەۆ ەڭبەك ادامىنا بايلانىستى ۇلكەن ماسەلەلەردى كوتەرگەن بولاتىن. سول سۇراقتاردىڭ بارلىعى بۇگىن دە كۇن تارتىبىندە تۇر. سوندىقتان ەڭبەك ادامىنىڭ مارتەبەسىن، بەدەلىن كوتەرۋگە ءتيىستىمىز. پارتيامەن كوپتەگەن سۇراقتارىمىز ورتاق. پەداگوگ مارتەبەسىنە بايلانىستى كوپتەگەن سۇراق تالقىلاندى. ءبىز ەنگىزگەن ۇسىنىستاردىڭ ناقتى 14-ءى قابىلداندى. سول سۇراقتاردىڭ ىشىندە قانشاما شەشىمىن تاپقان ماسەلەلەر وسى جەردە «Nur Otan» پارتياسى اياسىندا وتكەن وتىرىستان كەيىن جانداندى دەپ ايتسام ارتىق ەمەس» - دەدى ەرالى توعجانوۆ.
ايتا كەتەيىك، «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك جۋىردا اتىراۋ وبلىسىنا جاساعان جۇمىس ساپارى بارىسىندا، ماقات اۋدانىنىڭ دوسسور كەنتىندە «دوسسورمۇنايگاز» كاسىپورىن قىزمەتكەرلەرىمەن كەزدەسكەن ەدى. وندا مۇناي سالاسى جۇمىسشىلارىنىڭ جالاقى ماسەلەسى مەن جەرگىلىكتى تۇرعىنداردى جۇمىسپەن قامتۋ جايى دا ءسوز بولدى. سونداي-اق، جەرگىلىكتى دارىگەرلەرمەن جۇزدەسۋ كەزىندە ولاردىڭ مارتەبەسى مەن قۇقىقتىق تۇرعىدان قورعالۋ ماسەلەلەرى قوزعالدى. قازىرگى تاڭدا پارتيا باسقا دا سالالارداعى قىزمەتكەرلەردىڭ قۇقىقتارىن قورعاۋعا مۇددەلى.
وسى ورايدا، جۇمىسپەن قامتۋ باعىتى بويىنشا پارتيالىق كۋراتور الاڭىندا وسى سالاداعى كوپتەگەن ماسەلەلەردى كوتەرىپ، ولاردى شەشۋگە ىقپال ەتۋ كوزدەلۋدە. سونىمەن قاتار، پارتيا جۇمىسشىلاردىڭ ەڭبەك قۇقىقتارى مەن مۇددەلەرىن كوزدەۋ، ىشكى ەڭبەك نارىعىن قورعاۋ بويىنشا پارتيالىق جانە قوعامدىق باقىلاۋدى جۇزەگە اسىرۋعا بەل بۋىپ وتىر.
كەلەسى ءبىر باعىت – پارتيانىڭ قوعامدىق قابىلداۋلارى مەن كاسىپوداقتاردىڭ «تاتۋلاسۋ ورتالىقتارى» ارقىلى جۇمىسكەرلەردىڭ ناقتى ماسەلەلەرىن شەشۋ. الداعى جۇمىستارعا «Jas Otan» جاستار قاناتىنىڭ جانە «كەلەشەك» كاسىپوداق جاستار كەڭەسىنىڭ بەلسەندىلەرى دە تارتىلاتىن بولادى.
اتالعان جۇمىسقا «Nur Otan» پارتياسىنىڭ ماجىلىستەگى جانە بارلىق دەڭگەيدەگى ماسليحاتتارداعى فراكتسيالارى جۇمىلدىرىلماق. قازىرگى كەزدە كاسىپوداق ۇيىمدارىنىڭ وبلىستىق دەڭگەيدەگى 10 وكىلى، اۋداندىق جانە قالالىق دەڭگەيدەگى 16 وكىلى «Nur Otan» پارتياسى اتىنان ءماسليحات دەپۋتاتتارى بولىپ تابىلادى. الداعى سايلاۋدا وڭىرلەردەگى ماسليحاتتارداعى كاسىپوداقتاردىڭ وكىلدىگى ۇلعايتىلاتىن بولادى.
كلارا ناقىپ
