قر تسيفرلىق دامۋ، يننوۆاتسيا جانە اەروعارىش ونەركاسىبى ءمينيسترى اسقار جۇماعاليەۆ ەلەكتروندى ۇكىمەت پورتالى تۋرالى تۇسىنىك بەردى. بۇل تۋرالى turkystan.kz حابارلادى.
"ەلەكتروندى ۇكىمەتتىڭ جۇمىس ىستەۋ مۇمكىنشىلىگىنە توقتالساق، حالىققا قىزمەت كورسەتۋ ورتالىقتارى جابىلعاننان كەيىن، پورتال شتاتتىق رەجيمدە جۇمىس ىستەدى. توتەنشە جاعدايعا بايلانىستى پورتالدى پايدالانۋشىلار سانى بىردەن كوبەيدى. وسىعان قاراماستان پورتال شتاتتىق رەجيمدە جۇمىسىن جالعاستىرۋدا", – دەدى مينيستر «حابار 24» تەلەارناسىنىڭ تىكەلەي ەفيرىنەن.
ونىڭ سوزىنە قاراعاندا، تج كەزەڭىندە تۇرعىندارعا ميلليوننان استام ەلەكتروندى قىزمەت كورسەتىلدى. «كۇندەلىكتى رەجيمدە پورتالدا ساعاتىنا 600 مىڭ ءوتىنىم تۇسەتىن. قازىر ەڭ جوعارى شەكتەگى جۇكتەمە كەزىندە ساعاتىنا 15 ميلليونعا دەيىن جەتىپ وتىر. بۇل ءوز كەزەگىندە ەلەۋلى جۇكتەمە»، – دەدى ا. جۇماعاليەۆ.
بۇدان بولەك مينيستر توتەنشە جاعداي كەزىندە الەۋمەتتىك تولەمگە ءوتىنىم بەرۋدە كەيبىر قيىندىقتارعا بايلانىستى بولعان ەسكەرتۋلەرگە پىكىر ءبىلدىردى. ا. جۇماعاليەۆتىڭ ايتۋىنشا، 42 500 تەڭگەنىڭ تولەمى بويىنشا قىزمەتتى ەنگىزۋگە قاتىستى رەگلامەنت 28 ناۋرىزدا بەكىتىلدى. وسى ورايدا ءىت-ماماندارعا بۇل رەگلامەنت جەتكىزىلدى. «ءبىز ءتۇنى بويى جۇمىس ىستەپ، اتالعان قىزمەتتى ىسكە قوستىق. وسىدان كەيىن الەۋمەتتىك تولەمدى ۇسىنۋعا قاتىستى ءتيىستى قىزمەتتى ىسكە اسىرۋدى باستادىق. پورتالدا ءبىر مەزگىلدە 15 ميلليونعا دەيىنگى سەسسيا تىركەلدى. بۇل كورسەتكىش بارلىق شتاتتىق رەجيمدەردەن اسىپ ءتۇستى. ارينە، بۇل تۇرعىدا بەلگىلى ءبىر ماسەلەلەر تۋىنداپ، ءبىز پروبلەمالاردى شەشۋ ماقساتىندا سىرتقى كانالداردى اجىراتتىق»، – دەدى ۆەدومستۆو باسشىسى.
مينيستر ارىپتەستەرىنە العىس ءبىلدىرۋدى دە ۇمىتقان جوق.
بۇدان بۇرىن حابارلانعانداي، 42 500 تەڭگەلىك الەۋمەتتىك تولەم 3 ميلليونعا جۋىق ادامعا بەرىلەدى. سونىمەن قاتار، ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ساۋىردە ەلىمىزدە 42 500 تەڭگەلىك تولەمدى الۋعا بولاتىن، ول ءۇشىن ارنايى سايتتىڭ اشىلاتىنىن مالىمدەگەن.
Turkystan.kz
