بۇكىلالەمدىك جۋرناليستيكا زەرتتەۋلەرى - Worlds of Journalism Study Association (WJS) 2010 جىلى قۇرىلعان الەمدەگى جۋرناليستيكانىڭ احۋالىن تۇراقتى باعالايتىن اكادەميالىق جوبا. ليۋدۆيگ-ماكسيميليان ميۋنحەنس ۋنيۆەرسيتەتىنىڭ پروفەسسورى توماس حانيچتىڭ ۇيلەستىرۋىمەن عالامدىق زەرتتەۋ توبى بۇگىندە 110 ەلدىڭ جۋرناليستيكا اكادەميالىق وشاقتارىن باسىن بىرىكتىرگەن. الەمدىك QS توپ-ۋنيۆەرسيتەتتەردىڭ مەديا جانە كوممۋنيكاتسيا زەرتتەۋلەرى رەيتينگىسىنىڭ كوشباسشى كافەدرالارى جەتەكشىلىگىمەن افريكا، ازيا، ورتالىق جانە شىعىس ەۋروپا، لاتىن امەريكاسى جانە كاريب ارالدارى، تاياۋ شىعىس جانە سولتۇستىك افريكا، باتىس ەۋروپا، سولتۇستىك امەريكا، اۆستراليا جانە جاڭا زەلانديا ەلدەرىنىڭ ۇلتتىق نارىعىن زەرتتەۋدى باستادى.
زەرتتەۋدىڭ باستى ماقساتى – جۋرناليستەر، رەپوپەرتەرلارعا جۇمىس بابىندا قويىلاتىن شارتتار، شەكتەۋلەرگە قاتىستى كاسىبي كوزقاراستارى، دۇنيەتانىمىنداعى وزگەرىستەردى جاقسى تۇسىنۋدە، سونداي-اق الەمدەگى پاندەميا جاعدايىندا جۋرناليستيكانىڭ الەۋمەتتىك فۋنكتسياسىن ايقىنداۋ سانالادى.
اسسوتسياتسيانىڭ جارعىسىندا اتالعانداي، باستى مىندەتى عىلىمي زەرتتەۋلەردى قولداۋ مەن الەمدەگى جۋرناليستيكانىڭ جاي-كۇيىن باعالاۋ. WJS سەرىكتەستەرى رەتىندە يۋنەسكو، جۋرناليستەردىڭ حالىقارالىق فەدەراتسياسى، شەكاراسىز رەپورتەرلەر، جۋرناليستەر دايارلاۋدىڭ ەۋروپالىق اسسوتسياتسياسى سياقتى بەلدى ۇيىمدار بار.
العاشقى پيلوتتىق زەرتتەۋلەر 2007-2011 جىلداردى قامتىسا، كەلەسى تولقىنى 2012 – 2016 جىلداردىڭ اراسىندا جۇرگىزىلدى. زەرتتەۋلەرگە العاشىندا الەمنىڭ 67 ەلىنەن عالىمدار قاتىسىپ، ۇلتتىق دەڭگەيلەردە جۋرناليستيكا كەيستەرىن باعالاسا، ەكىنشى كەزەڭىندە جالپى مەتودولوگيالىق بازالىق زەرتتەۋلەرگە 27 500 جۋرناليست قاتىسقان. Worlds of Journalism زەرتتەۋلەرى جۋرناليستەردىڭ قىزمەتتىك مىندەتتەرىن ورىنداۋداعى جاڭاشىل تاسىلدەرى، ولاردىڭ قوعام مەن ۇكىمەت اراسىنداعى قارىم-قاتىناسى، سونداي-اق جۇمىسىنىڭ سيپاتى مەن ءمانىن باعالاۋدان تۇرادى.
2020-2022 جىلداردى قامتيتىن WJS ءۇشىنشى تولقىن زەرتتەۋلەرىنە 110 ەلدىڭ ىشىنەن قازاقستان عالىمدارى العاش قاتىسۋدا. قازىر رەسپۋبليكا بويىنشا 2500 ءجۋرناليسى قامتيتىن بولجامدى رەسپوندەنتتەر بازاسى ازىرلەنىپ جاتىر. ءال-فارابي اتىنداعى قازۇۋ عالىمدارى WJS اياسىندا زەرتتەۋلەر جۇرگىزۋگە دايىن. بۇل ەلىمىزدە جۋرناليستيكانىڭ ۇلتتىق ەرەكشەلىگىن جاھاندىق دەڭگەيدە تانىتۋعا جاڭا جول اشادى.
گۇلميرا سۇلتانباەۆا،
ءباسپاسوز جانە ەلەكتروندى باق كافەدراسىنىڭ مەڭگەرۋشىسى
