نۇر-سۇلتاندا قانداي الەۋمەتتىك قولداۋ ورتالىقتارى بار؟  

3731
Adyrna.kz Telegram

قازىرگى كەزدە قازاقستاندا 7 بالادان اساتىن  3151 وتباسى بار. «التىن القا»، «كۇمىس القا» القالارىمەن ماراپاتتالعان نەمەسە بۇرىن «باتىر انا» اتاعىن العان جانە «انا داڭقى» وردەنىمەن ماراپاتتالعان كوپبالالى انالارعا  مەملەكەتتىك جاردەماقى تولەنۋدە.  ولاردىڭ ورتاشا مولشەرى 16 160 تەڭگەنى قۇرايدى.

وتباسىعا مەملەكەتتىك الەۋمەتتىك كومەك كورسەتۋدىڭ نەگىزگى ماقساتى – تۇرمىسى تومەن وتباسىلارعا كومەك كورسەتۋ. مەملەكەت باسشىسىنىڭ 2019 جىلعى 2 قىركۇيەكتەگى قازاقستان حالقىنا جولداۋىن ىسكە اسىرۋ اياسىندا ااك-ءتى جاڭعىرتۋ جۇرگىزىلدى، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مىندەتتى الەۋمەتتىك ساقتاندىرۋ، الەۋمەتتىك قامسىزداندىرۋ جانە دەنساۋلىق ساقتاۋ سالاسىنداعى مەملەكەتتىك-جەكەشەلىك ارىپتەستىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» 2019 جىلعى 26 جەلتوقساندا №287 زاڭ قابىلدانىپ، 2020 جىلعى 1 قاڭتاردان باستاپ كۇشىنە ەندى.

قر ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتى بويىنشا، 2020 جىلى ااك كورسەتۋدىڭ جاڭا تەتىگىمەن 998 671 ادامدى، ونىڭ ىشىندە كەپىلدەندىرىلگەن الەۋمەتتىك توپتامامەن شامامەن 600 مىڭ ادامدى قامتۋ جوسپارلانۋدا. وسى ماقساتتا بيۋدجەتتەن 175,5 ملرد تەڭگە، ونىڭ ىشىندە رەسپۋبليكالىق بيۋدجەتتەن 127,9 ملرد تەڭگە، جەرگىلىكتى بيۋدجەتتەن 47,6 ملرد تەڭگە ءبولىندى.

ەلىمىزدە جوعارىدا اتاپ وتكەن كومەكتەردەن بولەك، تۇرعىندارعا قىزمەت كورسەتۋدىڭ وزگە دە جولدارىن قاراستىرعان. وسى ورايدا ءبىز نۇر-سۇلتان قالاسىنداعى «جانۇيا» جانە «قامقورلىق» ورتالىقتارىنىڭ جۇمىسىنا توقتالىپ وتكەندى ءجون كوردىك.

وتباسىلاردى قولداۋعا ارنالعان «جانۇيا» ورتالىعى ءوز جۇمىسىن 2019 جىلدىڭ  26 تامىز كۇنى باستادى. ورتالىق  قيىندىققا كەزىككەن  جانۇيالارعا كومەك كورسەتۋمەن اينالىسادى. باسىنا اۋىرتپالىق تۇسكەن انالارعا وڭتايلى بولۋى ءۇشىن كورسەتىلەتىن قىزمەتتىڭ ءبارى «ءبىر تەرەزە» پرينتسيپىمەن جۇمىس ىستەپ كەلەدى.

«ورتالىق اشىلعاننان بەرى 5 068 ادام 9 927 سۇراق بويىنشا جۇگىندى. ونىڭ ىشىندە 7685 سۇراق بويىنشا جۇيەلى كەڭەستەر بەرىلدى. مىسالى، اتاۋلى الەۋمەتتىك كومەك (ااك ەسەپتەۋ، كەدەيلىك شەگىنەن اسىپ كەتۋ) الۋ، «باقىتتى وتباسى»، «بەرەكەلى باسپانا» باعدارلامالارى بويىنشا تۇرعىن ءۇي الۋ، نەسيەلىك بورىشتى جابۋ، اليمەنت، بەرەشەك ءوندىرۋ، كوشى-قون، زاڭدى بۇزۋ، اجىراسۋ ماسەلەلەرى بويىنشا ناقتى جۇمىستار اتقارىلادى. قۇقىقتىق كومەكتەر كورسەتىپ، ازاماتتارعا بوس جۇمىس ورىندارىن ۇسىنىپ، ەڭبەكپەن قامتيدى»، - دەيدى  «جانۇيا» وتباسى ينستيتۋتىن قولداۋ ورتالىعىنىڭ ديرەكتورى ايگەرىم تاڭىربەرگەنوۆا.

«جانۇياعا» ەلوردا تۇرعىندارى مىنا ماسەلەلەر بويىنشا ءجيى كەلەدى:

-ااك الۋ، ءبىلىم الۋ;

-جۇمىسقا ورنالاسۋ;

- ءوز ءىسىن اشۋ;

-بالالاردى كەزەككە قويۋ;

-نەسيەلىك بورىشتى جابۋ;

-قىسقا مەرزىمدى بيزنەس كۋرستار;

- بىرىڭعاي زەينەتاقى جيناقتاۋشى قورىنىڭ قىزمەتتەرى;

-كامەلەتكە تولماعاندار جاسوسپىرىمدەردىڭ قۇقىقتارىن قورعاۋ;

-قازپوشتا قىزمەتتەرى;

-تۇرعىن ءۇي باعدارلامالارىنا قاتىسۋ ت.ب.

ورتالىقتا 30-عا جۋىق مامان جۇمىس ىستەيدى، سونداي-اق پسيحولوگتار مەن مەدياتورلار بار. مەكەمەدە بارلىق جاعداي جاسالعان: ەرەكشە قاجەتتىلىكتەرى بار ادامدارعا ارنالعان ليفتىلەر بار، بالالار ءۇشىن ارنايى ويىن ايماعى اشىلعان، ورتالىق قىزمەتكەرلەرى بالالارعا قارايدى. ماماندار ءوز ءىسىن اشۋعا كومەك كورسەتەدى، كاسىپكەرلەر موتيۆاتسيالىق بيزنەس-ترەنينگتەر وتكىزەدى. 60 مامان 70-تەن استام قىزمەت ءتۇرىن كورسەتەدى.

ورتالىقتىڭ «كاسىپكەر انا» جوباسى  كوپبالالى جانە از قامتىلعان وتباسىلارعا ءوز كاسىبىن اشۋعا جان-جاقتى كومەك كورسەتىپ كەلەدى.

ال «قامقورلىق» كۆورينگ ورتالىعى بيىلعى جىلى اشىلدى. ول ن.نازارباەۆ قورى مەن نۇر-سۇلتان قالاسى اكىمدىگىنىڭ بىرلەسۋىمەن قۇرىلدى. ورتالىقتا كوپبالالى انالار، جالعىز باستى انالار، ەرەكشە كۇتىمدى قاجەت ەتەتىن بالالاردى تاربيەلەيتىن ايەلدەر، از قامتىلعان ازاماتتار جانە اۋىر تۇرمىستىق جاعدايدا ءومىر سۇرەتىن بالالار، مۇگەدەكتەر وقىتىلادى.

ورتالىق 7 باعىت بويىنشا ترەنينگ وتكىزەدى: تاماق ونەركاسىبى، IT-يندۋستريا، سۇلۋلىق يندۋسترياسى، تىگىن ءىسى، كيىز باسۋ ونەرى، مەديا.

مۇندا ۇزاقتىعى ءبىر ايدان ءۇش ايعا دەيىن سوزىلاتىن كۋرستار بار. وسى كۋرستار ارقىلى جىلىنا 1800 ايەلدى وقۋدى جوسپارلاپ وتىر. وقۋ ناتيجەلەرى بويىنشا ولارعا سەرتيفيكاتتار بەرىلىپ، «ەڭبەك» باعدارلاماسى بويىنشا ءوز ىستەرىن اشۋعا 505 مىڭ تەڭگە كولەمىندە گرانت بەرىلەدى.

گۇلۆيرا اسقار،

«ادىرنا» ۇلتتىق پورتالى

پىكىرلەر