20 قىركۇيەك كۇنى استانادا ەسىل اۋدانىندا اۋدان اكىمدىگىنىڭ ۇيىمداستىرۋىمەن سەنبىلىك ءوتتى. ونىڭ اياسىندا 700-گە جۋىق اعاش – قاراعاش، يۆا، توپول، سيرەن جانە ەمەن كوشەتتەرى وتىرعىزىلدى.
تاڭەرتەڭ باستالعان شاراعا اۋدان تۇرعىندارى، سپورتشىلار، مۇعالىمدەر مەن وقۋشىلار بەلسەندى قاتىستى. ولار تابيعاتتى قورعاۋعا، تۋعان جەرىن كوگالداندىرۋعا ۇلەس قوسىپ، بولاشاق ۇرپاق ءۇشىن جاسىل بەلدەۋ قالىپتاستىرۋدى ماڭىزدى دەپ اتاپ ءوتتى.
اۋدان اكىمدىگىنىڭ ينسپەكتورى ورمانباەۆ ناريمان شارانىڭ ماڭىزدىلىعىنا توقتالىپ:
«700-گە جۋىق اعاش وتىرعىزۋ جوسپاردا بولعان، بۇگىن سول جوسپار جۇزەگە اسىرىلدى. بۇل اۋماق كەزدەيسوق تاڭدالعان جوق – تۇرعىنداردان جىل سايىن جاسىل جەلەككە قاتىستى كوپتەگەن ءوتىنىش تۇسەدى. سوندىقتان مۇندا ارنايى جاسىل ايماق جاسالۋدا. سونىمەن قاتار بۇگىن ورىنبور كوشەسىندە، تۇركىستان كوشەسىندە دە اعاش وتىرعىزۋ جۇمىستارى ءجۇرىپ جاتىر. قازان ايىندا بوتانيكالىق ساياباققا دا اعاش وتىرعىزۋ جوسپارىمىز بار. ەڭ باستىسى – تۇرعىنداردىڭ بەلسەندىلىگى قۋانتادى. سپورتشىلار، مۇعالىمدەر، وقۋشىلارعا دەيىن كەلىپ، ءوز قولدارىمەن كومەكتەسىپ جاتىر»، – دەدى.
شاراعا قاتىسقان اۋدان تۇرعىنى شاكيروۆ ەدىلباي دا اسەرىمەن ءبولىستى:
«اكەم مارقۇم ورمانشى بولعان، سول سەبەپتى تابيعاتقا جاقىن ءوستىم. بۇگىنگى اعاش وتىرعىزۋ شاراسى – وتە يگى باستاما. بۇل بالالارىمىزدىڭ بولاشاعىنا، ءوزىمىزدىڭ دەمالىسىمىزعا پايدالى. تابيعاتتى قورعاۋ – ءاربىرىمىزدىڭ بورىشىمىز»، – دەدى ول.
تاعى ءبىر تۇرعىن، وسى پريگورودنىي مولتەك اۋدانىنىڭ تۇرعىنى، ءوز ريزاشىلىعىن ءبىلدىرىپ:
«اۋدانىمىز كۇن سايىن كوركەيىپ كەلەدى. اكىمشىلىككە العىسىمىز شەكسىز. قانشاما قىرۋار جۇمىستار اتقارىلىپ جاتىر، كوشەلەرىمىز جاسىل جەلەككە ورانىپ، اۋىلىمىزدىڭ ءسانى ارتىپ كەلەدى. ءتىپتى ورماننىڭ ىشىندە جۇرگەندەي اسەر الامىز. مۇنداي جۇمىستاردىڭ پايداسى وتە زور: بىرىنشىدەن، اۋامىز تازارادى، ەكىنشىدەن، كوزىمىز تويادى، كوڭىلىمىز كوتەرىلەدى. مەن ءوزىم قازىر زەينەتتەمىن، ەكى نەمەرەم بار. سولاردىڭ بولاشاعى ءۇشىن وسىنداي باستامالارعا قولداۋ كورسەتىپ، ءوز ۇلەسىمىزدى قوسىپ جۇرگەنىمىزگە قۋانامىز. بۇل – ءار ادامنىڭ مىندەتى: ءۇي سوعىپ قانا قويماي، تال ەگىپ، تابيعاتقا قامقور بولۋ. قازىر اۆتوبۋسپەن ءوتىپ بارا جاتىپ-اق جاسىلدانعان كوشەلەردى كورىپ، ۇلكەن قالاعا كىرگەندەي اسەر الامىز. وسى پاركتىڭ ىشىندە دەمالىپ وتىرعاننىڭ ءوزى ءبىر عانيبەت. جان-جاعىمىزدا تۇراتىن بارلىق كورشىلەرىمىز دە ريزاشىلىقتارىن ءبىلدىرىپ ءجۇر. ءبارىمىز بىرىگىپ وسىنداي يگى ىسكە قاتىسىپ جاتقانىمىزدى ماقتان ەتەمىز»، – دەدى.
اعاشتار وتىرعىزىلعان اۋماققا سۋارۋعا ارنالعان ىدىستار دايىندالدى. كوشەتتەردىڭ ءارى قاراي كۇتىمى جاسالىپ، ۋاقىتىلى سۋارىلىپ تۇراتىندىعى قاداعالانادى.
وسىنداي سەنبىلىكتەر استانانىڭ ەكولوگيالىق جاعدايىن جاقسارتىپ قانا قويماي، تۇرعىنداردىڭ تابيعاتتى ايالاۋ مادەنيەتىن ارتتىرۋعا ىقپال ەتۋدە.
