اقتوبە وبلىسىندا قىزىل كىتاپقا ەنگەن اعاشتار وتىنعا كەسىلگەن، دەپ حابارلايدى "ادىرنا" پورتالى قر ءىىم تجك ءباسپاسوز قىزمەتىنە سىلتەپ.
«7 قاراشادا حازىرەت اۋىلىنىڭ ماڭىندا تىركەمەسى بار ەكى تراكتور توقتاتىلدى. اۋىل شارۋاشىلىعى تەحنيكالارىنىڭ تىركەمەلەرىنە قازاقستاننىڭ قىزىل كىتابىنا ەنگەن جانە مەملەكەت قورعاۋىندا تۇرعان سيرەك كەزدەسەتىن اعاشتاردىڭ تيەلگەنى انىقتالدى»، - دەدى پوليتسيا حابارلاماسىندا.
53 جانە 56 جاستاعى ەكى اۋىل تۇرعىنى كولىك جۇرگىزگەن. ايتۋلارىنشا، وزەن جاعاسىنداعى اعاشتاردى كەسىپ، وتىنعا پايدالانباق بولعان.
قازاقستان رەسپۋبليكاسى قىلمىستىق كودەكسىنىڭ 339-بابى «سيرەك كەزدەسەتىن جانە قۇرىپ كەتۋ قاۋپى تونگەن تۇرلەرمەن، سونداي-اق وسىمدىكتەر مەن جانۋارلاردىڭ تىيىم سالىنعان تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ» بابىنىڭ 1-بولىگى بويىنشا قىلمىستىق ءىس قوزعالدى. ءتيىستى ساراپتامالار تاعايىندالدى»، - دەلىنگەن حابارلامادا.
