2019 جىلى «سك-فارماتسيا» كومپانياسىنىڭ ءبىر قىزمەتكەرىنىڭ ايلىعى 852 مىڭ تەڭگەنى قۇراسا، جالپى وسى جىلعا جالاقى قورىنا 1,5 ملرد. تەڭگە جۇمسالادى دەپ جوسپارلاعان، سونىڭ ىشىندە ءبىر جولعى ىنتالاندىرۋعا كەتكەن سىياقى مولشەرى 273 ملن.تەڭگە. بۇل تۋرالى "ادىرنا" ۇلتتىق پورتالى Zertteu Research Institute ۇكىمەتتىك ەمەس ۇيىمىنا سىلتەمە جاساي وتىرىپ حابارلايدى.
2018 جىلى قىزمەتكەرلەردىڭ سانى 129 ادام بولسا، ولاردىڭ ەڭبەك اقىسىنا ناقتى 1,1 ملرد.تەڭگە جۇمسالعان. وسىلايشا ءبىر ادامنىڭ ورتاشا ايلىق جالاقىسى 733 مىڭ تەڭگەگە جەتىپ وتىر. ال 2018 جىلى ءبىر رەتتىك ىنتالاندىرۋ تولەمى – 242 ملن. تەڭگە بولىپتى.
2017 جىلمەن سالىستىرعاندا بۇل كومپانيا قىزمەتكەرلەرىنىڭ قاتارى قاتتى ارتپاسا دا جالاقى قورىنا جۇمسالاتىن قارجى كولەمى ءبىرشاما وسكەندىگىن كورۋگە بولادى. 2017 جىلى ەڭبەك اقى قورى 919 ملن.تەڭگە بولسا، بۇل اقشاعا 2018 جىلى 250 ملن. تەڭگە، ال 2019 جىلى 350 ملن. تەڭگە قوسىلعان. وسىلايشا 2018 جىلى ايلىعى 600 مىڭ تەڭگە بولعان قىزمەتكەردىڭ ايلىعىنا بىردەن 200 مىڭ تەڭگە قوسىلىپ، ەڭبەك اقىسى 800 مىڭ تەڭگەگە جەتتى.
سەرىكتەستىك قازاقستان رەسپۋبليكاسىنىڭ فارماتسەۆتيكالىق سالاسىنىڭ تۇراقتىلىعى مەن باسەكەگە قابىلەتتىلىگىن ارتتىرۋ، دارىلىك زاتتاردى، مەديتسينالىق ماقساتتاعى بۇيىمدار مەن مەديتسينالىق تەحنيكانى ساتىپ الۋدى شوعىرلاندىرۋ جولىمەن فارماتسەۆتيكالىق ونەركاسىپتى دامىتۋ ماقساتىندا قۇرىلعان دەپ جازىلعان gr5.gosreestr.kz – تە جاريالانعان دامۋ جوسپارىندا.
وسى سايتتاعى دامۋ جوسپارىنىڭ مالىمەتى بويىنشا «سك- فارماتسيا» جشس جارعىلىق كاپيتالداعى ۇلەسى 100 پايىز مەملەكەتكە تيەسىلى ەكەندىگى كورسەتىلگەن.
وسى مالىمەتتەردى وقىپ وتىرىپ، قىزمەتكەرلەرىنىڭ ەڭبەكتەرى باسقا سالادا جۇرگەندەرگە قاراعاندا ەداۋىر جوعارى باعالاناتىن، ءوزىنىڭ ماقساتى ەلىمىزدىڭ فارماتسەۆتيكالىق سالاسىنىڭ تۇراقتىلىعى مەن باسەكەگە قابىلەتتىلىگىن دامىتۋ دەپ كورسەتىلگەن، ونىڭ ۇستىنە 100 پايىز مەملەكەتتىڭ قاراماعىنداعى (باقىلاۋىنداعى) كومپانيا بولا تۇرا، وسىنداي قىسىلتاياڭ كەزدە ءوزى از حالىقتى دەر كەزىندە كەرەك دارىمەن نەگە قامتاماسىز ەتە الماي قالدى ەكەن؟
«ادىرنا» ۇلتتىق پورتالى
