كوروناۆيرۋس ينفەكتسياسىن جۇقتىرىپ، استاناعا بارىپ ەمدەلىپ كەلگەن الماتى وبلىسىنىڭ اكىمى اماندىق باتالوۆ وڭىردە ىندەتتىڭ نە سەبەپتى ءورشىپ كەتكەنىن حابارلادى. بۇل تۋرالى Facebook پاراقشاسىندا ءتۇسىندىردى.
"قۇرمەتتى جەتىسۋلىقتار!
سوڭعى كەزدە بىرقاتار اۋدان، قالا اكىمدەرى كوروناۆيرۋس ينفەكتسياسىنىڭ تارالۋىنا قارسى كۇرەس جۇمىستارىن بوساڭسىتىپ الدى. ارينە، وعان كەيبىر وبلىستىق باقىلاۋشى قۇرىلىمدار باسشىلارىنىڭ سىرقاتتانۋى سياقتى وبەكتيۆتى سەبەپتەرمەن قاتار باسقا دا فاكتورلار اسەر ەتكەنى بەلگىلى.
سونىمەن قاتار بەلگىسىز سەبەپتەرمەن وپەراتيۆتى شتابتىڭ جۇمىسى توقتاپ قالعان، بىراق ەڭ باستىسى - ينفەكتسيالىق جانە پروۆيزورلىق بولىمدەردىڭ جۇمىس الگوريتمى بۇزىلعان. جەكەلەگەن جاعدايلاردا كوروناۆيرۋسپەن اۋىرعان ازاماتتارمەن بايلانىستا بولعان، "قىزىل ايماقتا" سانالاتىن مەديتسينا ماماندارى قوعامدىق كولىكپەن قاتىناپ، وتباسى ورتاسىنا ورالىپ جۇرگەن.
مۇنداي جاعدايلاردىڭ مەن اۋدان، قالا اكىمدەرىمەن وتكىزگەن سەلەكتور جيىنى بارىسىندا تالدىقورعان، تەكەلى قالالارى مەن كەيبىر اۋدانداردا ورىن العانىن انىقتادىم. بۇل ەڭ الدىمەن جەرگىلىكتى جەرلەردەگى اكىمدەردىڭ، دەنساۋلىق ساقتاۋ باسقارماسى باسشىلىعىنىڭ ولقىلىعى، مەديتسينا مەكەمەلەرى باس دارىگەرلەرىنىڭ سانيتارلىق نورمالاردى ورەسكەل بۇزۋعا جول بەرگەنىنىڭ سالدارى.
وسىنىڭ بارلىعى جانە باسقا دا فاكتورلار، اسىرەسە، تالدىقورعان مەن تەكەلى قالالارىندا ىندەتتىڭ جىلدام ارتۋىنا سەبەپ بولدى، بۇل قالالاردا كوروناۆيرۋستىڭ ءوسىمى سəيكەسىنشە 11-12% قۇراپ وتىر.سوندىقتان بارلىق اۋدان، قالا اكىمدەرىنە حالىق اراسىندا ۆيرۋستىڭ ودان ءارى تارالۋىنا جول بەرمەۋدىڭ ءتيىستى شارالارىن قابىلداۋدى، وبلىس تۇرعىندارىنا ءتيىستى دەڭگەيدە ەم جاساۋدى ۇيىمداستىرۋ، ستاتسيونارلاردى قاجەتتى توسەك سانىمەن، مەديكامەنتتەرمەن، بارلىق قاجەتتى قۇرال-جابدىقتارمەن، سونىڭ ىشىندە ءوجج اپپاراتتارىمەن قامتۋ تاپسىرىلدى. قىسقا مەرزىم ىشىندە حالىق ءۇشىن پتسر تالداۋ جاسايتىن تاعى بىرنەشە قوسىمشا زەرتحانالار اشۋ جۇكتەلدى. وسى جۇمىستاردىڭ بارلىعىن تەز ارادا باستاۋدى، ونىڭ ناتيجەلەرى تۋرالى جەدەل شتابتى كۇندەلىكتى حاباردار ەتىپ وتىرۋدى تاپسىردىم.
مۇنداي شارالاردى قابىلداۋعا قاجەتتى بارلىق ماسەلەلەر شەشىلگەن، وبلىستىق بيۋدجەت قايتا قارالىپ، بارلىق قاجەتسىز باعدارلامالار قىسقارتىلىپ، مۇقتاج ادامدارعا مەديتسينالىق كومەك كورسەتۋگە جانە مەديتسينا ماماندارىن قولداۋعا قاجەتتى كولەمدە قارجى ءبولىندى. جالپى كوروناۆيرۋسپەن كۇرەس شارالارىنىڭ وزىنە عانا جەرگىلىكتى بيۋدجەتتەن 5 ملرد. تەڭگەگە جۋىق قارجى ءبولىندى.
وسى رەتتە قازىرگى اۋىر كەزەڭدە سىرقاتتارعا، مەديتسينا ماماندارىنا قايتارىمسىز، شىن پەيىلمەن ازىق-تۇلىك، ءدəرى-دəرمەك، قۇرال-جابدىق جəنە باسقا دا قاجەتتىلىكتەر əكەلىپ بەرىپ، قولداۋ كورسەتكەن بارشا جاندارعا شىن جۇرەكتەن العىسىمدى ايتامىن. راحمەت سىزدەرگە!
قۇرمەتتى جەرلەستەر، كارانتين تالاپتارىن قاتاڭ ساقتاپ، ءوز دەنساۋلىقتارىڭىز بەن جاقىندارىڭىزدىڭ دەنساۋلىعىنا جاۋاپتى قاراڭىزدار. قازىرگى كەزدە كوپ نارسە ءوزىمىزدىڭ سانالى əرەكەتىمىزگە بايلانىستى. وزدەرىڭىزگە، جاقىندارىڭىزعا جاناشىر بولىڭىزدار!
قۇرمەتپەن،
اماندىق باتالوۆ، - دەلىنگەن فەيسبۋك جازباسىندا
